តុលាការឃុំខ្លួន យុវជន ២ នាក់ ក្នុងចំណោម ១០ នាក់ ស្រុកស្អាង ករណីគប់ដុំថ្ម ហាងមីហឹរ

កណ្តាល៖ ជនរងគ្រោះឈ្មោះ ផន ស្រីនាង ភេទស្រី អាយុ ២៧ ឆ្នាំ ជនជាតិខ្មែរ មុខរបរអាជីវករ មានទីលំនៅនៅ ភូមិឫស្សីស្រុក២ ឃុំឈើទាល ស្រុកកៀនស្វាយ ខេត្តកណ្តាល។
ជនត្រូវចោទទី ១ ឈ្មោះ ស៊ុន តៃលី ភេទប្រុស អាយុ ១៨ ឆ្នាំ ជនជាតិខ្មែរ មានទីលំនៅភូមិព្រែកជ័រ ឃុំស្វាយប្រទាល ស្រុកស្អាង ខេត្តកណ្តាល មុខរបរ កម្មករសំណង់ និងទី ២ ឈ្មោះ វី លីហ៊ ហៅ ចិន ភេទប្រុស អាយុ ១៧ ឆ្នាំ ជនជាតិខ្មែរ មានទីលំនៅដូចគ្នា មុខរបរ កម្មករ សិស្ស។
យុវជន ២ នាក់ ក្នុងចំណោមគ្នា ១០ នាក់ បានត្រូវលោក ស៊ូ បញ្ញា ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីការឃុំខ្លួន ដាក់ពន្ធនាគារបណ្តោះអាសន្ន ពីបទ “ធ្វើឱ្យខូចខាតដោយចេតនា” តាមមាត្រា ៤១០ នៃក្រមព្រហ្មទណ្ឌ បន្ទាប់ពីពួកគេគប់ដុំថ្ម ហាងមីហឹរ នៅស្រុកកៀនស្វាយ ហើយរត់ទៅផ្ទះនៅស្រុកស្អាង ខេត្តកណ្ដាល។
មុនពេលកើតហេតុ ជនសង្ស័យខាងលើ បានជិះម៉ូតូដើរលេងមកខាងម្តុំសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដោយមានបក្សពួកទាំងអស់ ១២ នាក់ ជិះម៉ូតូចំនួន ៤ គ្រឿង។ លុះដល់ម៉ោង ២ និង ៣០ នាទី ឆ្លងចូលថ្ងៃទី ៣០ ខែមករា ឆ្នាំ២០២២ ជនសង្ស័យខាងលើរួមទាំងបក្សពួក បាននាំគ្នាជិះម៉ូតូមកផ្ទះវិញនៅខាងស្រុកស្អាង។ ពេលមកដល់ម្តុំឃុំឈើទាល ជនសង្ស័យខាងលើបានឈប់ម៉ូតូ រើសដុំថ្មមួយដុំ កាន់ជាប់នឹងដៃ ជិះម៉ូតូរហូតមកដល់មុខហាង មីហឹរ ជនសង្ស័យឈ្មោះ ស៊ុន តៃលី បានយកដុំថ្មគប់សំដៅទៅលើហាងមី ហឹរ ចំនួន ១ ដុំ ដោយជនសង្ស័យឈ្មោះ ខួច ភេទប្រុស ជាអ្នកបើកម៉ូតូ រីឯជនសង្ស័យឈ្មោះ វី លីហ៊ ហៅចិន ភេទប្រុស ជាអ្នកអង្គុយកណ្តាល ពេលគប់រួចជនសង្ស័យ និងបក្សពួកបានជិះម៉ូតូទៅផ្ទះរៀងៗខ្លួន។
ក្រោយកើតហេតុភ្លាម ជនរងគ្រោះបានលឺសូរសំឡេងគេគប់ហាង ក៏ចេញមកមើលរួចឆែកមើលកាមេរ៉ាសុវត្ថិភាពក៏ឃើញជនសង្ស័យខាងលើ និងបក្សពួកធ្វើសកម្មភាពគប់ហាងរបស់ខ្លួន។
លុះដល់ថ្ងៃទី ៣០ ខែមករា ឆ្នាំ ២០២២ វេលាម៉ោង ១៧ និង ១០ នាទី ទើបជនរងគ្រោះមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឈើទាល។ ក្រោយពីទទួលពាក្យបណ្តឹងរួច កម្លាំងប៉ុស្តិ៍នគរបាលរដ្ឋបាលឈើទាល សហការជាមួយកម្លាំងផ្នែកនគរបាលយុត្តិធម៌ស្រុកកៀនស្វាយ ចុះស្រាវជ្រាវមុខសញ្ញារហូតកំណត់មុខសញ្ញា រួចកម្លាំងសមត្ថកិច្ចបាននាំជនសង្ស័យខាងលើយកមកសាកសួរនៅប៉ុស្តិ៍នគរបាលរដ្ឋបាលឈើទាល។
នៅចំពោះមុខសមត្ថកិច្ចជនសង្ស័យឈ្មោះ ស៊ុន តៃលី បានសារភាពថា ខ្លួនពិតជាបានយកដុំថ្ម គប់ហាងមីហឹរពិតប្រាកដមែន។
ជនសង្ស័យរួមទាំងវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុកកៀនស្វាយ ចាត់ការបន្តរតាមនីតិវិធីច្បាប់ ៕