បុរសជនជាតិចិនម្នាក់ ទំនងជាស្រវឹងស្រា បើករថយន្តជ្រុលទៅបុកឡំប្រឺតាមួយគ្រឿង រុញផ្ទប់ទៅ បុកបង្គោលភ្លើងបំភ្លឺផ្លូវ បណ្ដាលឱ្យអ្នកបើកឡំប្រឺតារងរបួសធ្ងន់

ភ្នំពេញ ៖ នៅ ថ្ងៃទី៧ ខែកុម្ភៈ ឆ្នាំ២០២២ នៅតាមបណ្ដោយផ្លូវជាតិលេខ១ ស្ថិតក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។

នៅមុនពេលកើតហេតុគេឃើញបុរសម្នាក់បានបើកឡំប្រឺតាពណ៌សពាក់ស្លាកលេខព្រៃវែង 1M-9900តាមបណ្តោយផ្លូវជាតិលេខ១ក្នុងទិសដៅពីលិចទៅកើត ពេលបើកមកដល់ចំណុចកើតហេតុស្រាប់តែមានបុរសជនជាតិចិនម្នាក់ទំនងជាស្រវឹងស្រាខ្លាំងបានបើករថយន្តម៉ាក Range Rover ពណ៌ស ពាក់ស្លាកលេខ ភ្នំពេញ 2BA-9110 ក្នុងទិសដៅបញ្រ្ចាសគ្នាពីកើតទៅលិចយ៉ាងលឿន ខណៈមកដល់ចំណុចកើតហេតុបានរេចង្កូតឆ្លងចូលទៅគន្លងផ្លូវម្ខាងទៀតជ្រុលទៅបុកឡំប្រឺតាពេញទំហឹង ប៉ើងទៅបុកផ្ទប់នឹងបង្គោលភ្លើងបាក់អស់១ដើម បណ្តាលឱ្យម្ចាស់ឡំប្រឺតារងរបួសធ្ងន់ ត្រូវបានរថយន្តសាមុយដឹកយកទៅសង្រ្គោះភ្លាមៗ ចំណែកអ្នកបើករថយន្តបង្កហេតុបានរត់គេចខ្លួនពីកន្លែងកើតហេតុបាត់ស្រមោល។

សមត្ថកិច្ចមូលដ្ឋានបានចុះមកដល់ហើយទំនាក់ទំនងទៅសមត្ថកិច្ចជំនាញចរាចរណ៍ឱ្យចុះមកស្ទូចយករថយន្តបង្ក និងឡំប្រឺតាយកទៅរក្សាទុកនៅការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ៕