គ្រោះថ្នាក់ចរាចរណ៍ រវាងរថយន្តបុកម៉ូតូ និងកង់បី បណ្តាលឲ្យមនុស្ស ០២នាក់ រងរបួសធ្ងន់

ភ្នំពេញ: ករណីគ្រោះថ្នាក់ចរាចរណ៍ មួយបានកើតឡើង បុរសម្នាក់បើករថយន្តព្រូស មួយគ្រឿង ដោយខ្វះការប្រុងប្រយ័ត្ន ជ្រុលបុកម៉ូតូមួយគ្រឿង និងកង់បីមួយគ្រឿងពេញទំហឹង បណ្តាលឲ្យបុរស២នាក់រងរបួសធ្ងន់ ទីតាំងកន្លែងកើតហេតុ ស្ថិតត្រង់ចំណុចផ្សារទំនើបឡាក់គី តាមបណ្ដោយផ្លូវណត់ប្រ៊ីត ក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ នៅ យប់ថ្ងៃទី១០ ខែកុម្ភ: ឆ្នាំ២០២២ ។
នៅមុនពេលកើតហេតុ គេឃើញបុរសម្នាក់ បើកបររថយន្ត មួយគ្រឿងម៉ាកតូយ៉ូតាព្រូស ពណ៌ទឹកប្រាក់ ពាក់ស្លាកលេខភ្នំពេញ 2BO-1363 បើកបរក្នុងស្ថានភាពស្រវឹងជោកជាំ តាមបណ្ដោយផ្លូវណត់ប្រ៊ីត ទិសដៅពីជើងទៅត្បូងក្នុងល្បឿនលឿន ។ លុះពេលធ្វើដំណើរមកដល់ត្រង់ចំណុចកើតហេតុ ដោយខ្វះការប្រុងប្រយ័ត្ន រថយន្តនោះបានជ្រុលទៅបុកចំពីក្រោយម៉ូតូ មួយគ្រឿង ម៉ាកហុងដាវ៉េវ ពណ៌ខៀវ គ្មានស្លាកលេខជាម៉ូតូសម្រាប់សណ្តោងរ៉ឺម៉ក ជិះដោយប្តីប្រពន្ធ០២នាក់និងបុកចំពីក្រោយម៉ូតូកង់បី មួយគ្រឿងទៀតម៉ាក បាចា ពណ៌ស ពាក់ស្លាកលេខភ្នំពេញ 1IS-9358 បើកបរដោយបុរសម្នាក់ បណ្តាលឲ្យម៉ូតូរងការខូចខាត និងអ្នកបើកបរម៉ូតូជាប្តីរងរបួសបាក់ជើង ។ ចំណែកម៉ូតូកង់បីនោះវិញ បានរងការខូចខាតក្រពឹតផ្នែកខាងក្រោយចំហៀងខាងស្ដាំ រីឯអ្នកបើកបរបានរងរបួសធ្ងន់ ។ ជនរងគ្រោះត្រូវបានដឹកបញ្ជូនទៅកាន់មន្ទីរពេទ្យភ្លាមៗ ដើម្បីជួយសង្រ្គោះបន្ទាន់ផងដែរ ៕