ឃាត់ខ្លួនជនសង្ស័យម្នាក់ ដែលជាមនុស្សមានសតិមិនគ្រប់ ពាក់ព័ន្ធករណី លួចកាំភ្លើងអាកាស្វាយបត់ ចំនួន២ដើម

ខេត្តសៀមរាប ៖ កាលពីថ្ងៃទី១២ ខែកុម្ភៈ ឆ្នាំ២០២២ ឃាត់ខ្លួនជនសង្ស័យម្នាក់ដែលជាមនុស្សមានសតិមិនគ្រប់ ពាក់ព័ន្ធករណី លួចកាំភ្លើងអាកាស្វាយបត់ចំនួន២ដើម នៅក្នុងស្នាក់ការប៉ូលិស ។
ជនសង្ស័យរូបនោះមានឈ្មោះ យ៉ាន យីន អាយុ៣៧ឆ្នាំ រស់នៅភូមិគោកដូងថ្មី ឃុំគោកដូង ស្រុកអង្គរជុំ ខេត្តសៀមរាប ។ មានប្រជាពលរដ្ឋបានរាយការណ៍ប្រាប់ទៅសមត្តកិច្ចថា គេប្រទះឃើញឈ្មោះ យ៉ាន យីន កំពុងយកអាវុធ AK ស្វាយបត់ចំនួន២ដើម ទៅលាក់ទុកនៅចំណុចអណ្ដូងច្រោក ស្ថិតនៅភូមិគោកដូងថ្មី ឃុំគោកដូង ស្រុកអង្គរជុំ ខេត្តសៀមរាប ។
ឃាត់ខ្លួនជនសង្ស័យឈ្មោះ យ៉ាន យីន និងដកហូតអាវុធ AK 47 ស្វាយបត់ ចំនួន២ដើមនោះ ដោយមានទាំងគ្រាប់ចំនួន១២គ្រាប់ផងដែរ ។ ជនរូបនោះជាមនុស្សមានសតិមិនប្រក្រតី និងបានពិនិត្យអាវុធនោះទៅ ទើបដឹងថា ជាអាវុធសម្រាប់ប្រើប្រាស់នៅក្នុងអធិការនគរបាលស្រុកអង្គរជុំ ដែលត្រូវបានចោរចូលលួចបាត់ កាលពីអំឡុងដើមខែកម្ភៈ ឆ្នាំ២០២២ កន្លងមកនេះ ។
ជនសង្ស័យបានឆ្លើយសារភាពថា ប្រហែលជាកន្លះខែមុន វេលាម៉ោង៨យប់ ខ្លួនបានដើរចូលក្នុងអធិការដ្ឋាននគរបាលស្រុកអង្គរជុំ ហើយបានមើលតាមទ្វារកញ្ចក់ ក៏ឃើញកាំភ្លើ.ងទុកក្នុងបន្ទប់ ខ្លួនក៏បានលូកដៃតាមស្រវាដកគន្លឹះទ្វារ ហើយចូលទៅលួចយកកាំភ្លើ.ងអាការបស់សមត្ថកិច្ចចំនួន២ដើម ដែលកាំភ្លើ.ងទាំងនោះមិនបានចាក់សោរទេ ។ ជនសង្ស័យបានឲ្យដឹងថា រូបគេជាមនុស្សកាប់មិនមុត ដុតមិនឆេះ បើមានកាំភ្លើង គ្មានអ្នកណាអាចយកឈ្នះគេបានទេ លុះដល់ថ្ងៃទី១២ ខែកុម្ភៈ រូបគេក៏បានទៅយកកាំភ្លើ.ងនោះ មកកាន់ក៏ត្រូវសម្ថកិច្ចឃាត់ខ្លួនតែម្តងទៅ ។ នេះគ្រាន់តែជាចម្លើយរបស់ជនសង្ស័យ ដែលសមត្ថកិច្ចមិនទាន់អាចយកជាផ្លូវការបានទេ ដោយសារជនសង្ស័យមានស្មារតីមិនប្រក្រតី ៕