ឧកញ៉ា គីម ហ៊ាង ចេញលិខិតសូមទោសជាសាធារណៈ ចំពោះការប្រព្រឹត្តកំហុសដ៏ធំ និយាយប៉ះពាល់ដល់វប្បធម៌ជាតិ

(ភ្នំពេញ)៖ នៅថ្ងៃទី១៧ ខែកុម្ភៈ ឆ្នាំ២០២២នេះ ឧកញ៉ា គីម ហ៊ាង អ្នករកស៊ីក្នុងវិស័យអចលនទ្រព្យ បានចេញលិខិតសូមទោសជាសាធារណៈ ដល់ប្រជាជនកម្ពុជា អាជ្ញាធរមានសមត្ថកិច្ចគ្រប់លំដាប់ថ្នាក់ ពិសេសដល់ថ្នាក់ដឹកនាំប្រទេស ចំពោះកំហុសដ៏ធំ ដែលបានបង្កើតឡើងដោយអចេតនា ប៉ះពាល់វប្បធម៌ជាតិ។
ក្នុងលិខិតរបស់ឧកញ៉ា គីម ហ៊ាង បានលើកឡើងយ៉ាងដូច្នេះថា «ខ្ញុំបាទសូមលំឱនកាយ លើកម្រាមដៃដប់ ដើម្បីសូមទោសជាសាធារណៈ ដល់ប្រជាជនកម្ពុជា អាជ្ញាធរមានសមត្ថកិច្ចគ្រប់លំដាប់ថ្នាក់ ពិសេសដល់ថ្នាក់ដឹកនាំប្រទេស ចំពោះកំហុស ដែលខ្ញុំបាទបានបង្កើតឡើងដោយអចេតនាកាលពីថ្ងៃសៅរ៍ ទី១២ ខែកុម្ភៈ ឆ្នាំ២០២២ នៅទីរួមខេត្តសៀមរាប»។
សូមជម្រាបថា ការចេញមកសូមទោសជាសាធារណៈ របស់ឧកញ៉ា គីម ហ៊ាង ធ្វើឡើងបន្ទាប់ពីមានការប្រតិកម្មជាច្រើន ជុំវិញការលើកឡើងប៉ះពាល់ដល់វប្បធម៌កម្ពុជា ពិសេសតំបន់វប្បធម៌សៀមរាបអង្គរ៕