មន្ទីរបរិស្ថានខេត្តមណ្ឌលគិរី ឃាត់មនុស្ស២នាក់ រួមទាំងអាវុធ

មណ្ឌលគិរី៖ មន្ត្រីឧទ្យានុរក្សនៃដែនជម្រកសត្វព្រៃស្រែពក បានចុះប្រតិបត្តិការល្បាត តាមដាន អង្កេត ស្រាវជ្រាវ បង្ការ ទប់ស្កាត់ និងបង្ក្រាបបទល្មើសធនធានធម្មជាតិ ត្រង់ចំណុចណងប៊ួរ ដែលមាននិយាមកា ៧៣៤៧៦៤-១៤៦៤១៣០ កាលពីថ្ងៃទី១៩ ខែកុម្ភៈ ឆ្នាំ២០២២ក្នុងភូមិណងប៊ួរ ឃុំណងឃីឡឹក ស្រុកកោះញែក ខេត្តមណ្ឌលគិរី ។

ការល្បាតនោះបានប្រទះជនសង្ស័យ០២នាក់ ជិះម៉ូតូ០២គ្រឿង ស្ពាយកាំភ្លើង(AK)០១ដើម និងកាំភ្លើងកែឆ្នៃឆ្នុកដូង០១ដើម ចងនៅលើម៉ូតូ។ ឃើញដូច្នេះកម្លាំងសមត្ថកិច្ច បានស្ទាក់ចាប់ដោយជនសង្ស័យដឹងខ្លួន បានជិះម៉ូតូរត់គេច ហើយក្រុមការងារបានជិះម៉ូតូដេញតាមពីក្រោយ ក៏បានប៉ះម៉ូតូជនសង្ស័យពី ក្រោយដួល ហើយជនសង្ស័យបានក្រោកឈរទាញកាំភ្លើងបើកសោបម្រុងបាញ់មកលើសមត្ថកិច្ច តែ សមត្ថកិច្ចបានស្ទុះទៅចាប់កាំភ្លើងជនសង្ស័យជាប់ រួចក៏ដកហូតកាំភ្លើងពីជនសង្ស័យ និងចាប់ឃាត់ខ្លួនមនុស្សបាន០២នាក់។
សមត្ថកិច្ចបានរឹបអូសវត្ថុតាងរួមមាន៖
១- កាំភ្លើង(AK-47)ស្វ័យបត់ចំនួន០១ដើម គ្រាប់៣៧គ្រាប់
២- កាំភ្លើងឆ្នុកដូងចំនួន០១ដើម
៣- គ្រាប់ប្រដាងចំនួន៥០គ្រាប់ និងរំសេវផ្ទុះចំនួនកន្លះដប
៤- ម៉ូតូម៉ាកវេវ(ឆ្លាម) ចំនួន០១គ្រឿង
៥- ម៉ូតូម៉ាកវេវ(អេស) ចំនួន០១គ្រឿង
វត្ថុតាងទាំងអស់បានយកមករក្សាទុកនៅស្នាក់ការត្រពាំងត្រាច ដើម្បីបន្តនីតិវិធី ៕