ឃាត់ខ្លួនជនសង្ស័យម្នាក់ ពាក់ព័ន្ធករណីអំពើលួចគម្របរីហ្គែរ ធ្វើអំពីសំណរបាហាំង

សៀមរាប: ស្រាវជ្រាវ និងល្បាតជាប្រចាំ នៅថ្ងៃទី២៥ ខែកុម្ភៈ ឆ្នាំ២០២២ នៅចំណុចភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប កម្លាំងប៉ុស្តិ៍នគរបាលរដ្ឋបាលស្លក្រាម បានល្បាត ហើយ ក៏ប្រទះឃើញ ជនសង្ស័យម្នាក់កំពុងធ្វើសកម្មភាពដោះគម្របរីហ្គែលូ ពេលឃើញសមត្ថកិច្ចយើងជនសង្ស័យបានព្យាយាមរត់គេច តែរត់មិនរួច ក៏ត្រូវបានកម្លាំងនគរបាលយើងឃាត់ខ្លួនបាន រួមជាមួយម៉ូតូសណ្តោងងរ៉ឺម៉ក០១គ្រឿង (មានភិនភាគដូចក្នុងទិន្ន័យកាមេរ៉ាសុវត្ថិភាពដែលកម្លាំងជំនាញប្រមូលបាន) មានគម្របរីហ្គែរ ធ្វើពីសំណរបាហាំង មួយឈុតផងដែរ ។
ជនសង្ស័យមានឈ្មោះ វ៉ាន់ សំបូរ ហៅកុយ អាយុ ៣៤ឆ្នាំ មុខរបរ រើសអេតចាយ មានស្រុកកំណើតនៅភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប បច្ចុប្បន្នរស់នៅភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប ។
ជនសង្ស័យបានឆ្លើយសារភាពថា គម្របរីហ្គែរដែលរូបខ្លួនដឹកតាមរ៉ឺម៉កម៉ូតូនេះ បានលួចនៅតាមផ្លូវក្នុងភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប ហើយជនសង្ស័យបានឆ្លើយសារភាពបន្តទៀតថា នៅក្នុងចន្លោះពីខែមករា ដល់ថ្ងៃទី១៦ ខែកុម្ភៈ ឆ្នាំ២០២២ រូបខ្លួនបានលួចគម្របរីហ្គែរ តាមបណ្តោយផ្លូវមាត់ស្ទឹង ក្នុងសង្កាត់ស្លក្រាម បានចំនួន០៥លើក សរុប ១៣គម្រប យកទៅកាត់ជាចំណែកៗ ដាក់ក្នុងការ៉ុង រួចដឹកយកទៅលក់ឱ្យកន្លែងលក់-ទិញអេតចាយ ក្នុងភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាបទាំងអស់ ដោយក្នុង១គីឡូ លក់បានតម្លៃ១,៥០០រៀល តែជនសង្ស័យមិនចាំចំនួនប្រាក់ដែលលក់បានសរុបនោះទេ ព្រោះពេលបានប្រាក់ហើយ ជនសង្ស័យយកទៅទិញថ្នាំញៀនជក់ និងចាយវាយអស់ ៕