រថយន្ដ lexus rx400h មួយគ្រឿង បើកបរដោយបុរសម្នាក់ ក្នុងល្បឿនលឿនបត់ផ្លូវកោង រេចង្កូតជ្រុលទៅបុកដើមឈើ បណ្តាលឲ្យបាក់រាបដល់ដី ឯរថយន្តកល់ពីលើដើមឈើជាប់ទៅមុខលែងរួច

ភ្នំពេញ ៖ កាលពីវេលាម៉ោង១១ យប់ថ្ងៃទី ០៣ ខែមិនាឆ្នាំ ២០២២ នៅចំណុចមុខរោងចក្រមួយកន្លែងតាមបណ្ដោយផ្លូវ៣៧១សឡា ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
មុនកើតហេតុគេឃើញបុរសម្នាក់បើករថយន្ត lexus rx400h មួយគ្រឿង ពណ៌ស ពាក់ស្លាកលេខភ្នំពេញ2AI-7966 ធ្វើដំណើរតាមបណ្ដោយផ្លូវ៣៧១ សឡា ទិសដៅពីជើងទៅត្បូង លុះមកដល់ចំណុចកើតហេតុខាងលើផ្លូវកោង បានបត់ស្ដាំដៃទៅទិសខាងលិច បួងចង្កូតមិនទាន់ជ្រុលទៅបុកដើមឈើមួយដើមជាប់នឹងរបងរោងចក្របាក់រាបដល់ដី ឯរថយន្តខូចខាតមួយកំណាត់មុខយ៉ាងដំណំកល់លើដើមឈើជាប់ទៅមុខលែងរួច។
សមត្ថកិច្ចមូលដ្ឋានបានចុះមកដល់និងបានពិនិត្យនៅនឹងកន្លែងកើតហេតុ ដោយឃើញមិនមានប៉ះពាល់ដល់សម្បត្តិរដ្ឋ ក៏បានឲ្យភាគីរថយន្តបង្កធ្វើការសម្រុះសម្រួលជាមួយខាងម្ចាស់រោងចក្រដើម្បីបញ្ចប់រឿងនៅនឹងកន្លែងកើតហេតុ៕