មានតម្រុយខ្លះៗ ! ករណីឃាតកម្មលើកុមារី សិស្សសាលាបឋមសិក្សាទំនប់ក៥ នៅក្រុងប៉ោយប៉ែត

បន្ទាយមានជ័យ: លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំកម្លាំងនគរបាលការិយាល័យព្រហ្មទណ្ឌកម្រិតធ្ងន់ កម្លាំងនគរបាលក្រុងប៉ោយប៉ែត ចុះធ្វើកោសល្យវិច័្ចយសព និងត្រួតពិនិត្យកន្លែងកើតហេតុ ករណីឃាតកម្មលើកុមារីឈ្មោះ លួត លីហ្សា អាយុ៧ឆ្នាំ សិស្សសាលាបឋមសិក្សាទំនប់ក៥ នាភូមិទំនប់ក៥ សង្កាត់/ក្រុងប៉ោយប៉ែត កាលពីថ្ងៃទី១០ ខែមីនា ឆ្នាំ២០២២ ។

សូមរំលឹកថា កាលពីថ្ងៃទី០៩ខែមីនា ឆ្នំា២០២២នេះ កន្លងមក លោកបានទទួលបណ្ដឹងពីពលរដ្ឋម្នាក់ឈ្មោះ សំ សាន្ត ភេទប្រុស អាយុ៣៤ឆ្នាំ មុខរបរជាកម្មករ រស់នៅភូមិទំនប់ក៥ សង្កាត់ប៉ោយប៉ែត ដែលបានឱ្យដឹងថា ពួកគាត់បានបាត់កូនស្រីម្នាក់ឈ្មោះ លួត លីហ្សា ភេទស្រី អាយុ៧ឆ្នាំ បានទៅរៀននៅសាលាបឋមសិក្សាទំនប់ក៥ នៅម៉ោង១១ថ្ងៃ។ពោលគឺមិនឃើញកូនត្រឡប់មកផ្ទះ ហើយក៏មិនឃើញនៅសាលា ។ប៉ុន្តែ បន្ទាប់មកបានរកឃើញកាបូបនិងស្បែកជើងនាងនៅផ្លូវលំ១កន្លែង រួចក៏ប្ដឹងសុំឲ្យសមត្ថកិច្ចជួយរក។
លោកបានដឹកនាំកម្លាំងនគរបាលក្រោមឱវាទ ចុះធ្វើការស្រាវជ្រាវ រហូតដល់ម៉ោង៩:២០យប់ ទើបប្រទះឃើញសាកសពក្មេងស្រីរហែកខោអាវ អាក្រាតត្រូវបានគេសម្លាប់ហើយយកទៅកប់ក្នុងដីឡូត៍មួយកន្លែងសង្កត់ដុំថ្មនិងគ្របមែកឈើពីលើ ស្ថិតនៅភូមិក៥ ដោយមានសង្កត់ដុំថ្មនិងគ្រប់មេកឈើ ។
ក្រោយប្រទះឃើញសាកសពក្មេងស្រីរងគ្រោះ លួត លីហ្សា លោកក៏បានបញ្ជាឲ្យកម្លាំងនគរបាលផែនជំនាញ សហការជាមួយកម្លាំងនគរបាលក្រុងប៉ោយប៉ែត ចុះត្រួតពិនិត្យកន្លែងកើតហេតុ ដើម្បីធ្វើកោសលវិច្ច័យសព ពេលនេះលោកកំពុងដឹកនាំកម្លាំងចុះអនុវត្តនីតិវិធី ហើយមានតម្រុយខ្លះហើយ ។ យោងកោសល្យវិច័យលើសព នាំអោយសមត្ថកិច្ចសន្និដ្ឋានោះជាករណីឃាតកម្ម មិនមានរំលោភផងទេ ។
នៅរសៀលថ្ងៃ ព្រហស្បតិ៍ថ្ងៃទី ១០ ខែមីនា ឆ្នាំ២០២២ លោកវរសេនីយ៍សៅ សារឿនអធិការនគរបាលក្រុងប៉ោយប៉ែត បានដឹកនាំកម្លាំងក្រោមឱវាទ នាំយកអំណោយរបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ទៅចូលរួមបុណ្យសពក្មួយស្រី លួតលីហ្សានោះ ។អំណោយចូលរួមធ្វើបុណ្យសពរួមមាន: អង្ករ ១០០គីឡូក្រាម ទឹកសុទ្ធ ១០០យួរ និងថវិកា៥០០,០០០រៀល ៕