ជនសង្ស័យមួយក្រុម ឆក់កាបូបពីនារីម្នាក់ បានសម្រេច នៅចំណុចក្បែរស្ពានអាកាសស្ទឹងមានជ័យ

ភ្នំពេញ ៖ កាលពី យប់ ថ្ងៃទី១១ ខែមីនា ឆ្នាំ២០២២ នៅចំណុចក្បែរស្ពានអាកាសស្ទឹងមានជ័យ តាមបណ្ដោយផ្លូវព្រះមុន្នីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ។
នារីរងគ្រោះមានឈ្មោះ ហេង ពេជ្រមុនីនាថ អាយុ២៦ឆ្នាំ មុខរបរ ផ្នែកគណនេយ្យនៅក្រុមហ៊ុនមួយ ស្នាក់នៅក្នុងសង្កាត់ដង្កោ ខណ្ឌដង្កោ ។
មុនពេលកើតហេតុ រូបនាងបានជិះម៉ូតូម៉ាក SUZUKI Nek ពណ៌ស ពាក់ស្លាកលេខភ្នំពេញ 1BK-4909 ចេញពីរៀនគួរនៅក្បែរវិទ្យាល័យ ជា ស៊ីម សន្ធរម៉ុក រួចត្រឡប់ទៅផ្ទះវិញនៅម្ដុំចំការដូង ខណ្ឌដង្កោ ខណៈធ្វើដំណើរមកដល់ចំណុចកើតហេតុស្រាប់តែមានជនសង្ស័យ២នាក់ជិះម៉ូតូមួយគ្រឿងមិនចាំម៉ាក បានឆក់កាបូបរបស់នាងផ្ចូរនៅខាងមុខបានសម្រេច ហើយនាងក៏ឈប់ម៉ូតូភ្លាមៗក៏មានបក្ខពួកក្រុមជនសង្ស័យម្នាក់ទៀត មកកាច់សោរម៉ូតូដកយកទៅបន្ថែមទៀត ទើបធ្វើឲ្យរូបនាងជិះម៉ូតូដេញតាមមិនកើត ។
នារីរងគ្រោះបានឲ្យដឹងទៀតថា ក្នុងកាបូបរបស់នាងដែលត្រូវក្រុមចោរឆក់យកទៅនោះ មានទូរស័ព្ទមួយគ្រឿងម៉ាក Samsung ,កាតចាក់វ៉ាក់សាំង , កាតធានាគារ និងអត្តសញ្ញាប័ណ្ណ ។ សមត្ថកិច្ចនាំនារីរងគ្រោះទៅកាន់ប៉ុស្ដិ៍នគរបាលរដ្ឋបាល បឹងសាឡាង ដើម្បីសួរនាំ និងធ្វើកំណត់ហេតុកំណត់មុខសញ្ញា ៕