បុរសម្នាក់សង្ស័យជាជនជាតិចិន ជិះម៉ូតូលឿនខ្វះការប្រុងប្រយ័ត្នជ្រុលទៅបុករទេះអេតចាយ ដែលកំពុងឈប់លើស្ពានច្បារអំពៅ និងអូសជាច្រើនម៉ែត្រ បណ្ដាលឲ្យបោកក្បាលស្លាប់ ក្នុងថ្លុកឈាម

ភ្នំពេញ ៖ កាលពី យប់ថ្ងៃទី១១ ខែមីនា ឆ្នាំ២០២២ ស្ថិតនៅចំណុចលើស្ពានច្បារអំពៅ ក្នុងសង្កាត់ច្បារអំពៅ១ ខណ្ឌច្បារអំពៅ ។ សពជនរងគ្រោះនៅមិនទាន់ស្គាល់អត្តសញ្ញាណនៅឡើយ ដោយជាជនជាតិបរទេស ។

មុនពេលកើតហេតុ រូបគាត់បានអូសរទេះអេតចាយឡើងមកលើស្ពានច្បារអំពៅ បំណងទៅត្រើយម្ខាងទៀត ក្នុងទិសដៅពីលិចទៅកើត ខណៈអូសរទេះមកដល់ចំពាក់កណ្ដាលស្ពានក៏បានឈប់រទេះអេតចាយរួចក៏បត់ជើងតូច(នោម)មិនទាន់រួចផង ស្រាប់តែមានបុរសម្នាក់សង្ស័យជាជនជាតិចិនបានជិះម៉ូតូមួយគ្រឿងម៉ាកZOOMER -X ពណ៌ខ្មៅ ពាក់ស្លាកលេខភ្នំពេញ1HS-9912 ធ្វើដំណើរស្របគ្នាមកបុកពីក្រោយពេញទំហឹង បណ្ដាលឱ្យរទេះអេតចាយវិលមួយជុំប៉ះគាត់កំពុងឈរនោមរងរបួសស្រាល រីឯបុរសម្ចាស់ម៉ូតូអូសជាច្រើនម៉ែត្រ បណ្ដាលឱ្យបោកក្បាលលើស្ពានស្លាប់ក្នុងថ្លុកឈាមគួរឱ្យរន្ធត់។
ដោយឡែកសពជនរងគ្រោះ ក៏ត្រូវសមត្ថកិច្ចជំនាញធ្វើកំណត់ហេតុរួចប្រគល់ឱ្យរថយន្តសាមុយដឹកយកទៅតំកល់ទុកនៅវត្តស្ទឹងមានជ័យ រង់ចាំស្រាវជ្រាវរកក្រុមគ្រួសារមកទទួលសពយកទៅធ្វើបុណ្យតាមប្រពៃណី ៕