គ្រោះថ្នាក់ចរាចរណ៍ បុរសម្នាក់រួមដំណើរជាមួយបុរសម្នាក់ទៀត បើករថយន្ត រេចង្កូតទៅបុករថយន្តកុងតឺន័រពីក្រោយ រួចបន្តទៅបុកម៉ូតូមួយគ្រឿង ហើយរថយន្តបង្កនៅមិនទាន់អស់ល្បឿន ក៏បន្តទៅបុកបង្គោលភ្លើងមួយដើមទៀត

ភ្នំពេញ៖ កាលពី យប់ ថ្ងៃទី១៧ ខែមីនា ឆ្នាំ២០២២ នៅចំណុចមុខធនាគារABA តាមបណ្តោយផ្លូវចោមចៅ ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ ។

មុនពេលកើតហេតុគេបានឃើញរថយន្តម៉ាកKIA ពណ៌ទឹកប្រាក់ ពាក់ស្លាកលេខភ្នំពេញ2AG-9574 បើកបរដោយបុរសម្នាក់រួមដំណើរជាមួយបុរសម្នាក់ទៀត ធ្វើដំណើរតាមបណ្តោយផ្លូវចោមចៅក្នុងល្បឿនលឿន លុះមកដល់ចំណុចកើតហេតុស្រាប់តែបុករថយន្តកុងតឺន័រពីក្រោយ ហើយបានរេចង្កូតមកខាងស្តាំដៃក៏បន្តទៅបុកម៉ូតូវីវ៉ាពណ៌ខ្មៅពាក់ស្លាកលេខភ្នំពេញ1AY-2480 ដែលកំពុងឈប់នៅចិញ្ចើមផ្លូវបណ្តាលឱ្យរងការខូចខាតយ៉ាងដំណំ ហើយរថយន្តបង្កនៅមិនទាន់អស់ល្បឿនបានបន្តទៅបុកបង្គោលភ្លើងថ្មមួយដើមបាក់ជាពីរកំណាត់ ឯរថយន្តខូចខ្ទេចផ្នែកខាងមុខទាំងស្រុង និងបណ្ដាលឱ្យអ្នកបើកបររងរបួសធ្ងន់ចំណែកអ្នករួមដំណើររងរបួសស្រាល។ បន្ទាប់មករថយន្តសង្គ្រោះបន្ទាន់បានមកដឹកជនរងគ្រោះយកទៅសង្គ្រោះនៅឯមន្ទីរពេទ្យភ្លាមៗ។

សមត្ថកិច្ចជំនាញចុះមកធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមផ្លូវច្បាប់៕