មនុស្សម្នាក់ ស្លាប់ភ្លាមៗនៅនឹងកន្លែងកើតហេតុ និងមនុស្ស២នាក់ទៀត រងរបួសធ្ងន់ ត្រូវបានបញ្ជូនទៅសង្គ្រោះជាបន្ទាន់

ខេត្តតាកែវ ៖ នៅថ្ងៃទី២០ខែមីនា ឆ្នំា២០២២នេះ នៅលើផ្លូវជាតិលេខ២ត្រង់ចន្លោះគីឡូម៉ែត្រលេខ៤៩-៥០ស្ថិតក្នុងភូមិក្រាំងលាវ ឃុំរវៀង ស្រុកសំរោង ខេត្តតាកែវ។

រថយន្តបង្កហេតុជារថយន្តប្រភេទបែនម៉ាក mazda ចំណុះ២តោនកន្លះ ពណ៌ខៀវគ្មានស្លាកលេខ បើកបរដោយឈ្មោះ វង្ស រតនៈ ភេទប្រុស អាយុ៣០ឆ្នាំ មុខរបរបើកបរ រស់នៅភូមិស្រែតាសុខ ឃុំជម្រះពេន ស្រុកសំរោង ខេត្តតាកែវ(ស្លាប់នៅកន្លែងកើតហេតុ) រួមដំណើរដោយមនុស្ស២នាក់ទៀតគឺ១-ឈ្មោះ តឺម ភេទប្រុស អាយុ២៧ឆ្នាំ មុខរបរកសិករ រស់នៅភូមិកណ្តាល ឃុំរវៀង ស្រុកសំរោងខេត្តតាកែវ របួសធ្ងន់(បាក់ដៃ)។ ២-ឈ្មោះ ថន ភារុណ ភេទប្រុស អាយុ១៩ឆ្នាំ មុខរបរកសិករ រស់នៅភូមិត្រពាំងខ្នារ ឃុំជម្រះពេន ស្រុកសំរោង ខេត្តតាកែវ របួសធ្ងន់(បាក់ភ្លៅ)។ អ្នករងរបួសធ្ងន់ទាំង២នាក់ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្តតាកែវ រីឯសាកសពត្រូវបានក្រុមគ្រួសារយកទៅធ្វើបុណ្យតាមប្រពៃណី។

មូលហេតុគឺបណ្តាលមកពីអ្នកបើករថយន្តបើកបរក្នុងល្បឿនលឿនខ្វះការប្រុងប្រយ័ត្ន។ ចំពោះវត្ថុតាងរថយន្តត្រូវបានយកមករក្សាទុកនៅអធិការដ្ឋាននគរបាលស្រុកសំរោង ដើម្បីកសាងសំណុំរឿងតាមនីតិវិធី៕