រថយន្តសណ្ដោងកន្ទុយរ៉ឺម៉កមួយគ្រឿង បើកបុកម៉ូតូពីក្រោយ បណ្ដាលឲ្យយុវនិស្សិតម្នាក់បានស្លា..ប់ ពេលគេបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់

ភ្នំពេញៈ ហេតុការណ៍នេះ បានកើតឡើង កាលពី រសៀលថ្ងៃទី២២ ខែមីនា ឆ្នាំ២០២២ នៅលើមហាវិថីឈ្នះឈ្នះ ត្រង់ចំណុចខ្លោងទ្វារ វត្តភ្នៀតសិម្ពលី ភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ ។
យុវនិស្សិតដែលស្លាប់នោះ ឈ្មោះ ជៀវ ចាន់មេសា ភេទប្រុស អាយុ១៩ឆ្នាំ មានទីលំនៅ ភូមិគោកឃ្លៀង សង្កាត់គោកឃ្លៀង ខណ្ឌសែនសុខ រាជធានីភ្នំពេញ។ ដោយឡែក រថយន្តបង្ក ម៉ាកហុីណូ ពណ៌ស លាយស្វាយ ពាក់ស្លាកលេខ ភ្នំពេញ 3B-0135 ជារថយន្តរបស់ ក្រុមហ៊ុនដឹកជញ្ជូន LMH បើកបរដោយបុរស ពុំស្គាល់ឈ្មោះម្នាក់។
នៅមុនពេលកើតហេតុ យុវជនរងគ្រោះ បានជិះម៉ូតូម៉ាក ហុងដា ប៊ីត ពណ៌សលាយខៀវ ពាក់ស្លាកលេខ កំពត 1R-0834 ក្នុងទិសដៅពីខាងជើង ទៅខាងត្បូង លុះពេលទៅដល់ត្រង់ចំណុចកើតហេតុ ក៏ស្រាប់តែរថយន្តបង្ក ខាងលើ បើកលឿន ក្នុងទិសដៅស្របគ្នា ទៅដល់បុកពីក្រោយ ពេញទំហឹង បណ្ដាលឲ្យជនរងគ្រោះ រងរបួសធ្ងន់ធ្ងរ។
ក្រោយពេលកើតហេតុ គេបានបញ្ជូនជនរងគ្រោះ ទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗដែរ ប៉ុន្តែជាអកុសល បានបាត់បង់ជីវិត។ បន្ទាប់មក នគរបាលប៉ុស្តិ៍សំរោងក្រោម និងនគរបាលចរាចរណ៍ ខណ្ឌពោធិ៍សែនជ័យ បានចុះទៅពិនិត្យជាក់ស្ដែង និងរាយការណ៍ ទៅកាន់នគរបាល ការិយាល័យចរាចរណ៍ ផ្លូវគោក នៃស្នងការដ្ឋាននគរបាល រាជធានីភ្នំពេញ ចុះទៅធ្វើការវាស់វែង និងនាំយករថយន្ត និងម៉ូតូទៅរក្សាទុក រង់ចាំការដោះស្រាយ នៅពេលក្រោយ៕