ឃាត់ជនសង្ស័យម្នាក់ ក្នុងចំណោមបក្ខពួក២នាក់ ដែលធ្វើសកម្មភាពលួចម៉ូតូ នៅបន្ទាយមានជ័យ

បន្ទាយមានជ័យ ៖ នៅថ្ងៃទី២៤ ខែមីនា ឆ្នាំ២០២២ នៅភូមិកណ្តោល ឃុំគោករមៀត ស្រុកថ្មពួក ខេត្តបន្ទាយមានជ័យ ។ ម៉ូតូម៉ាកហុងដាវេវ ពណ៌ខៀវ ស៊េរីឆ្នាំ២០១៩ គ្មានផ្លាកលេខ មានម្ចាស់ឈ្មោះ រី ណើម ភេទប្រុស អាយុ៤១ឆ្នាំ ជាប្ដី និងប្រពន្ធឈ្មោះ ព្រឹល ធៀប អាយុ៤២ឆ្នាំ រស់នៅភូមិកណ្ដាល ឃុំគោករមៀត ស្រុកថ្មពួក ខេត្តបន្ទាយមានជ័យ ។
មុនពេលកើតហេតុ ប្រពន្ធម្ចាស់ម៉ូតូបានទុកម៉ូតូនៅក្រោមផ្ទះ ចំណែកបុរសជាប្តីជាប់រវល់សម្រាកនៅឯស្រែ ។ នៅវេលាម៉ោងប្រមាណជា១២យប់ ចោរបានធ្វើសកម្មភាពផ្តាច់ខ្សែកុងតាក់ លួចម៉ូតូនៅក្រោមផ្ទះជិះចេញមកបានចម្ងាយពីភូមិប្រមាណជា១.០០០ម៉ែត្រម៉ូតូធ្លាក់ច្រវាក់ ទើបក្រុមជនសង្ស័យបាននាំគ្នាអូសម៉ូតូ ។ ពេលនោះបានជួបក្មេងៗត្រឡប់ពីដើរលេង ជនសង្ស័យបានឲ្យពួកគេជួយដាក់ច្រវាក់ម៉ូតូ ប៉ុន្តែក្មេងៗទាំងនេះបានស្គាល់ម៉ូតូ និងដឹងថាច្បាស់ជាចោរលួច ពួកគេក៏ស្រែកឆោឡោផ្អើលដល់កម្លាំងប្រជាការពារ នាំគ្នាដេញប៉ផាប់ចាប់ពភីងឃាត់ខ្លួនបាន១នាក់ ប្រគល់ឲ្យនគរបាលប៉ុស្តិ៍រដ្ឋបាលឃុំគោករមៀត ។
ជនសង្ស័យដែលឃាត់ខ្លួនបានឈ្មោះ មី កាន ភេទប្រុស អាយុ២៨ឆ្នាំ រស់នៅភូមិវត្តចាស់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។ នៅចំពោះមុខសមត្ថកិច្ច ជននេះបានសារភាពថា ខ្លួននិងបក្ខពួកម្នាក់ទៀតឈ្មោះ លី លៀប ភេទប្រុសអាយុ១៧ឆ្នាំ ដែលរត់គេចខ្លួននោះរស់នៅភូមិជាមួយគ្នា ដោយឮដំណឹងថា វត្តកណ្តោលស្ថិតនៅភូមិកណ្តោល ឃុំគោករមៀត ស្រុកថ្មពួកនោះជិតធ្វើពិធីបញ្ចុះសីមា ពួកគេទាំង២នាក់ក៏មកស្នាក់នៅក្នុងវត្តកណ្ដោល ហើយក៏ធ្វើសកម្មភាពលួចម៉ូតូនេះតែម្តង ។ ចំណែកម៉ូតូប្រគល់ជូនម្ចាស់ដើមវិញ ចំពោះបក្ខពួកគេម្នាក់ទៀតកំពុងស្រាវជ្រាវរកចាប់ខ្លួន ៕