បុរសម្នាក់ ជិះម៉ូតូបុកប៉ះជាមួយរថយន្តមួយគ្រឿង ហើយខ្ទាតទៅចូលក្រោមរថយន្តមួយទៀត បណ្តាលឱ្យកិនស្លាប់ភ្លាមៗ

ព្រះសីហនុ: កាលពីថ្ងៃទី៣០ ខែមីនា ឆ្នាំ២០២២ បុរសម្នាក់បានជិះម៉ូតូបុកប៉ះជាមួយរថយន្តមួយគ្រឿង ហើយបានខ្ទាតទៅចូលក្រោមរថយន្តមួយទៀត បណ្តាលឱ្យកិនស្លាប់ភ្លាមៗ នៅលើផ្លូវជាតិលេខ៤ ចន្លោះគីឡូម៉ែត្រលេខ ១៧៦-១៧៧ ភូមិជើងគោ ឃុំជើងគោ ស្រុកព្រៃនប់ ខេត្តព្រះសីហនុ ។
រថយន្តដែលជនរងគ្រោះជិះបុកនោះ ម៉ាក HYUNDAI H1 ពាក់ស្លាកលេខ ព្រះសីហនុ ២A-៥៧៩៩ បើកបរដោយឈ្មោះ WEI MING ជនជាតិចិន ភេទប្រុស អាយុ៤៥ឆ្នាំ ស្នាក់នៅទីតាំងកើតហេតុ។ ចំណែករថយន្តមួយគ្រឿងទៀតដែលជនរងគ្រោះខ្ទាតចូលក្រោម ម៉ាកនីសាន់ ពាក់ស្លាកលេខ ខេមរ:ភូមិន្ទ ៣-២៨៦៣។ ដោយឡែកជនរងគ្រោះឈ្មោះ រិន រ៉ា អាយុ២៥ឆ្នាំ មុខរបរកម្មកររោងចក្រ មានទីលំនៅភូមិឃុំកើតហេតុដែរ។
សមត្ថកិច្ចបានចុះអន្តរាគមន៍ ប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី រីឯវត្ថុតាងបានយកមករក្សាទុកបណ្ដោះអាសន្ននៅអធិការដ្ឋាននគរបាលស្រុកព្រៃនប់ ខេត្តព្រះសីហនុ៕