ឃាត់ខ្លួនយុវជនម្នាក់ បានធ្វើសកម្មភាពចូលលួចម៉ូតូកូនសិស្ស ដែលកំពុងរៀននៅក្នុងអនុវិទ្យាល័យមួយកន្លែង

បាត់ដំបង៖ នៅរសៀលថ្ងៃទី ០១ មេសា ឆ្នំា២០២២នេះ នៅចំណុចអនុវិទ្យាល័យតាម៉ឺន ស្ថិតក្នុងភូមិកសិកម្ម ឃុំតាពូង ស្រុកថ្មគោល ។ ជនសង្ស័យឈ្មោះ ម៉ាប់ សំណាង ភេទប្រុស អាយុ២០ឆ្នាំ មានស្រុកកំណើតនៅភូមិប្រឡស់ ឃុំអូរម៉ាឡូ ស្រុកស្ទឹងត្រង់ ខេត្តកំពង់ចាម។ ជននេះ ត្រូវបានកម្លាំងកងរាជអាវុធហត្ថស្រុកថ្មគោលស្ទាក់ចាប់បានភ្លាមៗ ក្រោយពីធ្វើសកម្មភាពលួចយកម៉ូតូសិស្សអនុវិទ្យាល័យខាងលើ បានសម្រេច ហើយព្យាយាមជិះរត់គេច។ ម៉ូតូដែលជននេះ បានលួចយកនោះម៉ាកហុងដាឌ្រីម ស៊េរី១២៥ ពណ៌ខ្មៅ ពាក់ស្លាកលេខបាត់ដំបង 1X-9640 របស់ឈ្មោះ សឿម ស៊ាវម៉ី ភេទស្រី អាយុ១៤ឆ្នាំ ជាសិស្សអនុវិទ្យាល័យតាម៉ឺន រស់នៅភូមិបឹងព្រីង ឃុំបឹងព្រីង ស្រុកថ្មគោល ។

បើតាមប្រភពព័ត៌មាន បានចូលលួចយកម៉ូតូកូនសិស្សនេះ ខណៈពេលនាងកំពុងរៀននៅក្នុងបន្ទប់។ ប៉ុន្តែពេលលួចបាន ជននេះបានព្យាយាយជិះគេចខ្លួន តែត្រូវគេឃើញទាន់ក៏ប្ដឹងទៅសមត្ថកិច្ច ក៏តាមស្ទាក់ចាប់បានតែម្ដង។ កម្លាំងកងរាជអាវុធហត្ថកំពុងសួរនាំ និងចាត់ការតាមនីតិវិធី៕