ជនសង្ស័យម្នាក់ ក្នុងចំណោមបក្ខពួក៣នាក់ សមត្ថកិច្ចឃាត់ខ្លួន ក្រោយពីពួកគេឆក់ទូរស័ព្ទរបស់ជនជាតិចិនម្នាក់ បានសម្រេច

ភ្នំពេញ៖ កាលពី ថ្ងៃទី២២ ខែមេសា ឆ្នាំ២០២២ នៅចំណុចមុខផ្ទះជនរងគ្រោះលេខ២៩ បុរីញូវថោន ក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះZENG HUA ភេទប្រុស អាយុ៥០ឆ្នាំ ជាជនជាតិចិន មុខរបរកម្មករ ស្នាក់នៅបុរីញូវថោន ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ។
ចំណែកជនសង្ស័យដែលឃាត់ខ្លួនបានឈ្មោះកន ស៊ីធាន ភេទប្រុស អាយុ២៤ឆ្នាំ មុខរបរចុងភៅ ស្នាក់នៅភូមិតាងួន សង្កាត់កាកាបទី១ ខណ្ឌពោធិ៍សែនជ័យ។

មុនពេលកើតហេតុជនរងគ្រោះបានឈរមុខផ្ទះនិយាយទូរស័ព្ទ។ បន្ទាប់មកស្រាប់តែមានជនសង្ស័យ២នាក់ជិះម៉ូតូមួយគ្រឿងមិនចាំម៉ាកមកធ្វើសកម្មភាពឆក់យកទូរស័ព្ទម៉ាកអាយហ្វូន១២ប្រូពីជនរងគ្រោះបានសម្រេចហេីយបន្ថែមល្បឿនម៉ូតូដើម្បីគេចខ្លួន តែភ្លាមនោះជនរងគ្រោះនិងបក្ខពួកក៏បានរត់ដេញតាមពីក្រោយ ស្រាប់តែមានជនសង្ស័យម្នាក់ទៀតជិះម៉ូតូហុងដាឌ្រីមស៊េរីឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ1DO-9711 មកបិទគូទក៏ធាក់ម៉ូតូបក្ខពួកជនរងគ្រោះឈ្មោះលោង ផានី បណ្តាលឱ្យដួលម៉ូតូ ទើបជនរងគ្រោះឃាត់ខ្លួនជនសង្ស័យបានតែម្តង ចំណែកបក្ខពួកជនសង្ស័យបានយកទូរស័ព្ទជនរងគ្រោះគេចខ្លួនបាត់ទៅ។ ជនសង្ស័យត្រូវបានជនរងគ្រោះប្រគល់ជូនសមត្ថកិច្ចចាត់ការតាមផ្លូវច្បាប់៕