ភ្ញាក់ផ្អើល ប្រទះឃើញសាកសពបុរសជនជាតិចិនម្នាក់ ស្លាប់ សង្ស័យថា ជនរងគ្រោះ អាចធ្លាក់ពីលើអគារសណ្ឋាគារស៊ីយ៉ាធូហូថែ ជាន់ទី ១៣

ព្រះសីហនុ ៖ ករណីប្រទះឃើញមនុស្សស្លាប់នេះ បានកើតមានឡើង នៅម៉ោងប្រមាណ៨ព្រឹក ថ្ងៃទី២៥ ខែមេសា ឆ្នាំ២០២២ ទីតាំងកើតហេតុនេះស្ថិតនៅសណ្ឋាគារ ស៊ីយ៉ាធូ (ក្រោយសណ្ឋាគារប៉ារីសចាស់) ក្រុមទី៣ ភូមិ៣ សង្កាត់លេខ២ ក្រុង-ខេត្តព្រះសីហនុ។ សពជនរងគ្រោះមាន ឈ្មោះ GUI YUNFANG មិនទាន់ដឹងអាយុប៉ុន្មាន។
សាកសពបុរសជនជាតិចិនម្នាក់គេប្រទះឃើញដេកស្លាប់ផ្កាប់មុខដោយមានស្នាមរបួសនៅលើរាងកាយ។ ករណីនេះគេសង្ស័យថា ជនរងគ្រោះអាចធ្លាក់ពីលើអគារសណ្ឋាគារស៊ីយ៉ាធូហូថែ។
សមត្ថកិច្ចបានឲ្យដឹងថា នៅកន្លែងកើតហេតុគេឃើញសពជនរងគ្រោះ ដេកស្លាប់ផ្កាប់មុខនៅលើបន្ទះក្តា និងកៅស៊ូតង់ សពស្លៀកខោជើងវែង និងពាក់អាវយឺត បើពិនិត្យមើលជាក់ស្តែងនៅលើដៃទាំង២ មានស្នាមអារដាច់សាច់ឆ្នូតៗជាច្រើនកន្លែង។ សមត្ថកិច្ចបានឲ្យដឹងទៀតថា តាមការសន្និដ្ឋានបឋម ជនរងគ្រោះអាចធ្លាក់ពីលើអគារសណ្ឋាគារ ស៊ីយ៉ាធូ ជាន់ទី ១៣ បន្ទប់លេខ ១៣១១ បណ្តាលឱ្យស្លាប់នៅនឹងកន្លែងកើតហេតុ។
ទោះបីជាយ៉ាងណាករណីនេះក្រុមសមត្ថកិច្ចជំនាញ នឹងធ្វើការស្រាវជ្រាវដើម្បីរកមូលហេតុពិតជាបន្តទៀត។ សាកសពជនរងគ្រោះសមត្ថកិច្ចបានដឹកយកទៅរក្សាទុកនៅសាលរក្សាសពនៅមន្ទីរពេទ្យបង្អែកខេត្តព្រះសីហនុ ដើម្បីពិនិត្យនិងស្រាវជ្រាវបន្ថែមទៀត៕