បុរសជនជាតិចិនម្នាក់ បើករថយន្តឆ្លងផ្លូវក្នុងល្បឿនលឿន បុករថយន្តមួយគ្រឿងទៀត ខ្ទាតជាច្រើនម៉ែត្រ រួចជ្រុលបន្តទៅបុកចូលផ្ទះប្រជាពលរដ្ឋ

ភ្នំពេញ ៖ នៅ ថ្ងៃទី១៩ ខែមិថុនា ឆ្នាំ២០២៤ ស្ថិតនៅតាមបណ្ដោយផ្លូវ១០៥k កែងនឹងផ្លូវ៦៨K ភូមិចំការឪឡឹក២ សង្កាត់កាកាបទី២ ខណ្ឌពោធិសែនជ័យ រាជធានីភ្នំពេញ ។
នៅមុនពេលកើតហេតុ គេឃើញរថយន្តដែលរងគ្រោះម៉ាក ALPHARD ពណ៍ស ពាក់ស្លាកលេខ ភ្នំពេញ 2BU-2723 ធ្វើដំណើរតាមបណ្ដោយផ្លូវ១០៥K ក្នុងទិសដៅពីជើងទៅត្បួងក្នុងល្បឿនមធ្យម លុះមកដល់ចំណុចផ្លូវបំបែកជាបួនកែងនឹងផ្លូវ៦៨K ស្រាប់តែត្រូវរថយន្តមួយគ្រឿងម៉ាក VOLKSWAGEN. AMAROK ពណ៌ស ពាក់ស្លាកលេខ ភ្នំពេញ2AX-8166 បើកបរដោយជនជាតិចិនធ្វើដំណើរពីកើតទៅលិចឆ្លងផ្លូវយ៉ាងលឿន បានទៅបុករថយន្តរងគ្រោះពេញទំហឹងចំហៀងកង់ខាងមុខផ្នែកខាងឆ្វេង បណ្ដាលឲ្យខ្ទាតជាច្រើនម៉ែត្រដាច់កាឡេកង់ម្ខាង តែសំណាងល្អតៃកុងមិនមានរងរបួសនោះទេបានពោងសុវត្ថិភាពជួយ ។
ចំណែករថយន្តបង្កវិញបានជ្រុលចង្កូតឡើងលើឃឿនទៅបុករះចូលផ្ទះប្រជាពលរដ្ឋ២ល្វែង បណ្ដាលឲ្យខូចខាតសម្ភារៈអស់ជាច្រើនដូចជា ទូលក់អីវ៉ាន់និងទ្វាររមូលព្រមទាំងបាក់សសរជ្រី និងអីវ៉ាន់មួយចំនួនទៀតក្នុងហេតុការណ៍នោះដែរដោយមិនមានអ្នករងរបួសទេបន្ទាប់មកបង្កការភ្ញាក់ផ្អើលដល់អ្នកជិតខាងរាយការណ៍ទៅសមត្ថកិច្ចនគរបាលមូលដ្ឋានចុះមកអន្តរាគមន៍ភ្លាមៗរួចរាយការណ៍ទៅផ្នែកជំនាញចរាចរណ៍បន្ត ។
គ្រោះថ្នាក់ចរាចរណ៍នេះ ត្រូវសមត្ថកិច្ចនគរបាលផ្នែកជំនាញការិយាល័យចរាចរណ៍ធ្វើការវាស់វែងស្ទូចអូសយករថយន្តទាំងពីរគ្រឿងទៅរក្សាទុកជំនាញចរាចរណ៍ផ្លូវគោករងចាំធ្វើការដោះស្រាយបន្តពេលក្រោយ ៕