Euro 2024៖ ការជួបគ្នាចុងក្រោយ អង់គ្លេស ឈ្នះអេស្ប៉ាញ, ចុះផ្តាច់ព្រ័ត្រម៉ោង ២យប់នេះវិញ?

(ប៊ែកឡាំង)៖ ក្រុមបាល់ទាត់ជម្រើសជាតិអង់គ្លេស និងអេស្ប៉ាញ ខកខានជួបគ្នា ៦ឆ្នាំមកហើយ ពោលគិតចាប់តាំងពីតោកំណាចបានយកឈ្នះគោជល់ ៣-២ ក្នុងពានរង្វាន់លីគអឺរ៉ុប UEFA Nations League នាអំឡុងខែតុលា ឆ្នាំ២០១៨ កន្លងមក។
យ៉ាងណាក៏ដោយនាពេលនេះ ក្រុមទាំងពីរបានពើបប្រទះគ្នាជាថ្មីក្នុងជំនួបលើកទី២៨ ដើម្បីប្រជែងជើងឯកពានរង្វាន់ប្រចាំទ្វីបអឹរ៉ុប UEFA European Championship 2024 ដែលមានអាល្លឺម៉ង់ធ្វើម្ចាស់ផ្ទះនៅរាត្រីម៉ោង ២យប់រំលងអាធ្រាត្រឈានចូលព្រឹកថ្ងៃចន្ទ ទី១៥ ខែកក្កដា (ម៉ោងនៅកម្ពុជា) ធ្វើឡើងនៅពហុកីឡដ្ឋានជាតិអាល្លឺម៉ង់ Olympiastadion ដែលស្ថិតក្នុងទីក្រុងប៊ែកឡាំងតែម្តង។
ប្រវត្តិធ្លាប់ជួបគ្នា ២៧ប្រកួតមកនេះ អង់គ្លេសបានយកឈ្នះអេស្ប៉ាញ ១៤លើក ស្មើ ៣លើក និងចាញ់ ១០លើកផងដែរ។ ប៉ុន្តែបើនិយាយពីការជួបគ្នាក្នុងពានកម្រិតអឺរ៉ុប Euro នេះវិញ គេសង្កេតឃើញថា ក្រុមប្រទេសដែលមានលីគអាជីពល្បីលើលោកទាំងពីរនេះ ធ្លាប់ជួបគ្នាតែ ៤លើកប៉ុណ្ណោះ ដោយអង់គ្លេសឈ្នះ ៣ដង និងស្មើ ១ដង មិនដែលចាញ់អេស្ប៉ាញឡើយ។
អេស្ប៉ាញ ជាអតីតជើងឯក Euro ៣សម័យកាលស្មើនឹងអាល្លឺម៉ង់ច្រើនជាងគេ ស្របពេលគូប្រជែងតោកំណាចអង់គ្លេស មិនធ្លាប់ឈ្នះនោះទេ បានត្រឹមរងជើងឯកម្តងកាលឆ្នាំ២០២០ ពេលចាញ់អ៊ីតាលីដោយបាល់ ១១ម៉ែត្រកាត់សេចក្តី ក្នុងនាមជាក្រុមជើងឯកបាល់ទាត់ពិភពលោក World Cup ១លើកដូចគ្នា។
ជាការកត់សម្គាល់ផងដែរនៅ Euro លើកទី១៧ នេះ អេស្ប៉ាញដែលបានឈ្នះពានអឹរ៉ុបលើកចុងក្រោយក្នុងឆ្នាំ២០១២ បានទម្លាក់សុទ្ធតែក្រុមខ្លាំងក្នុងវគ្គចាញ់ធ្លាក់មានដូចជាបារាំង និងម្ចាស់ផ្ទះអាល្លឺម៉ង់ជាដើម ស្របពេលអង់គ្លេស ទម្លាក់ស្លូវ៉ាគី ស្វីស និងហូឡង់ ទាំងលំបាក ជាមួយនឹងការបើកផ្លូវឱ្យគូប្រកួតរកគ្រាប់នាំមុខថែមទៀតផង៕