Euro 2024៖ កីឡាករចេញពី Premier League មានដល់ទៅ ២៧នាក់ ត្រៀមលេងផ្តាច់ព្រ័ត្រ រវាងអង់គ្លេស និងអេស្ប៉ាញ រាត្រីនេះ

(ប៊ែកឡាំង)៖ កីឡាករបាល់ទាត់ល្បីៗដែលត្រូវបានជ្រើសចេញពីលីគកំពូល Premier League របស់អង់គ្លេសមានចំនួន ២៧រូប ត្រៀមបង្ហាញខ្លួនសម្រាប់វគ្គផ្តាច់ព្រ័ត្រ Euro 2024 រវាងតោកំណាចអង់គ្លេស និងគោជល់អេស្ប៉ាញ នៅប្រទេសអាល្លឺម៉ង់នាម៉ោង ២រំលងអធ្រាត្រនេះ (ម៉ោងនៅកម្ពុជា)។
បើយោងតាម Channel Telegram របស់ Euro 2024 បានបញ្ជាក់ផងថា នេះគឺជាចំនួនដ៏ច្រើនមិនធ្លាប់មាន នៅពេលប្រទេសទាំងពីរ មានកីឡាកររបស់ខ្លួនដែលត្រូវបានកោះហៅពី Premier League នៅពេលក្លិបមេឃខៀវ Manchester City មាន ៤នាក់ច្រើនជាងគេ ក្នុងចំណោម ២០ក្លិប។
តែយ៉ាងណាសម្រាប់ក្រុមតោកំណាចអង់គ្លេស ដែលស្ថិតក្រោមការបង្វឹករបស់លោក Gareth Southgate មានកីឡាករលេងនៅ Premier League ១៦នាក់ ក្នុងចំណោមសមាជិកសរុប ២៦នាក់ គ្រាដែលអេស្ប៉ាញវិញមាន ១១នាក់ ជ្រើសរើសចេញពីលីគអង់គ្លេស និងផ្សេងទៀតចេញពីលីគ La Liga របស់ខ្លួន។
គួរបញ្ជាក់ផងថា កីឡាករដែលត្រៀមឈ្នះស្បែកជើងមាស Golden Boot ដែលមាន ៣គ្រាប់ស្មើគ្នានោះគឺ Harry Kane របស់អង់គ្លេស និង Dani Olmo របស់អេស្ប៉ាញ ក្នុងនាមកីឡាករជ្រើសរើសចេញពីលីគ Bundesliga របស់អាល្លឺម៉ង់ដូចគ្នា៕