ខ្សែការពារស៊ែប៊ី Milenkovic ចូលរួមជាមួយក្លិប Forest លើកិច្ចព្រមព្រៀង ៥ឆ្នាំ

(ឡុងដ៍)៖ ខ្សែការពារកណ្តាលសញ្ជាតិស៊ែប៊ី Nikola Milenkovic បានចូលរួមជាមួយក្លិប Nottingham Forest លើកិច្ចព្រមព្រៀង ៥ឆ្នាំ បន្ទាប់ពីលេង ៧ឆ្នាំនៅក្លិបអ៊ីតាលី Fiorentina។ នេះបើយោងតាមក្លិបលេងនៅលីគកំពូលអង់គ្លេស Premier League ហើយត្រូវបានចុះផ្សាយដោយសារព័ត៌មាន CNA នៅថ្ងៃទី១៩ ខែកក្កដា ឆ្នាំ២០២៤។
Milenkovic វ័យ ២៦ឆ្នាំ ដែលបានលេងទាំង ៣ប្រកួតឱ្យក្រុមជម្រើសជាតិស៊ែប៊ីនៅព្រឹត្តិការណ៍ Euro ឆ្នាំ២០២៤ នោះ បានទទួលការកោះហៅ ៥៧លើក លេងឱ្យក្រុមជម្រើសជាតិ និងបានបង្ហាញខ្លួន ២១៦លើកនៅលីគកំពូលអ៊ីតាលី Serie A សម្រាប់ Fiorentina ដែលបានឡើងដល់វគ្គផ្តាច់ព្រ័ត្រ Europa Conference League កាលពីខែឧសភា។
សូមជម្រាបថា Forest នឹងធ្វើជាម្ចាស់ផ្ទះទទួលក្លិប Bournemouth ក្នុងការប្រកួតលីគ Premier League លើកដំបូងរបស់ពួកគេនៃរដូវកាលថ្មី នៅថ្ងៃទី១៧ ខែសីហាខាងមុខ៕