បុរសម្នាក់ លោតពីលើផ្ទះជាន់ទី៣ ធ្លាក់បោកលើថ្នល់មុខផ្ទះ បណ្ដាលឲ្យបាត់បង់ជីវិតភ្លាមៗ

ភ្នំពេញ ៖ ហេតុការណ៍នោះ បានកើតឡើងបង្កឲ្យមានការភ្ញាក់ផ្អើលកាលពី ល្ងាចថ្ងៃទី២៨ ខែតុលា ឆ្នាំ ២០២៤ ស្ថិតនៅក្នុងបូរីពិភពថ្មីចំការដូង ផ្លូវលេខ០៣ ផ្ទះលេខ៤១ ក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។

យោងតាមព័ត៌មានបឋម មានបុរសម្នាក់បានលោតពីលើផ្ទះជាន់ទី៣ ធ្លាក់បោកលើថ្នល់មុខផ្ទះ បណ្ដាលឲ្យបាត់បង់ជីវិតភ្លាមៗ ដោយពុំទាន់ដឹងពីមូលហេតុថាតើគាត់មានវិបត្តិអ្វីឡើយ ប៉ុន្តែបើតាមអ្នករស់នៅជិតកន្លែងកើតហេតុ បានប្រាប់ក្រុមអ្នកសារព័ត៌មានថា បុរសនេះមានបញ្ហាខួរក្បាល រយៈពេល៥ឆ្នាំមកហើយ ព្យាបាលមិនបានជាសះស្បើយឡើយ ។

បុរសរូបនោះពុំទាន់ត្រូវបានស្គាល់អត្តសញ្ញាណនៅឡើយទេ គាត់មានវ័យប្រមាណជាង៤០ឆ្នាំ ហើយគាត់រស់នៅកន្លែងផ្សេងទេ ប៉ុន្តែគាត់មានផ្ទះកើតហេតុនេះមួយទៀត ហើយយូរៗបានមកមើលផ្ទះនេះម្ដង ។ ដោយឡែកថ្ងៃកើតហេតុបុរសនោះ បានទៅដល់ផ្ទះកើតហេតុនៅវេលាម៉ោង៥ល្ងាច លុះដល់ពេលកើតហេតុពុំដឹងថា យ៉ាងម៉េចទេ ស្រាប់តែគាត់លោតពីលើជាន់ទី៣ផ្ទះនោះ បណ្ដាលឲ្យធ្លាក់បោកលើផ្លូវបែកក្បាលបាត់បង់ជីវិតភ្លាមៗតែម្ដង ។

សមត្ថកិច្ចមូលដ្ឋានបានសហការជាមួយនគរបាលការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ចុះធ្វើកោសល្យវិច័យ ព្រមទាំងសាកសួរសាក្សីជុំវិញទីតាំងកើតហេតុភ្លាមៗ ផងដែរ ៕