ឃាត់ខ្លួនជនស..ង្ស័យ ម្នាក់ ករណីរំលោ..ភលើទំនុកចិត្ត (ខ្ចីម៉ូតូ) ជាមុខសញ្ញាប្រើប្រាស់គ្រឿ..ងញៀ..ន និងជាមុខសញ្ញាលួ..ចយ៉ាងសកម្ម

ស្រុកបាទី៖ ឃាត់ខ្លួនជនសង្ស័យ ០១នាក់ ករណីរំលោភលើទំនុកចិត្ត (ខ្ចីម៉ូតូ) (ជាមុខសញ្ញាប្រើប្រាស់គ្រឿងញៀន និងជាមុខសញ្ញាលួចយ៉ាងសកម្មក្នុងមូលដ្ឋាន) ។

ដោយមានការចង្អុលបង្ហាញ ពីលោកឧត្តមសេនីយ៍ទោ ម៉ែន លី ស្នងការ នៃស្នងការដ្ឋាននគរបាលខេត្តតាកែវ និងសម្របសម្រួលនីតិវិធី ពីឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ និងដឹកនាំបញ្ជាផ្ទាល់ពីលោកវរសេនីយ៍ឯក ឆាយ កែវមុន្នី អធិការនគរបាលស្រុកបាទី នៅថ្ងៃទី២៨ ខែតុលា ឆ្នាំ២០២៤ កម្លាំងជំនាញនគរបាលព្រហ្មទណ្ឌ នៃអធិការដ្ឋាននគរបាលស្រុកបាទី សហការជាមួយកម្លាំងប៉ុស្តិ៍នគរបាលរដ្ឋបាលចំបក់ ទើបឃាត់ខ្លួនបានជនសង្ស័យឈ្មោះ ហេង តុលា ហៅក្លូត ភេទប្រុស អាយុ ២៣ឆ្នាំ នៅត្រង់ចំណុចផ្ទះសំណាក់សុធាវី ស្ថិតនៅភូមិសីហា ឃុំចំបក់ ស្រុកបាទី ខេត្តតាកែវ បានធ្វើសកម្មភាពខ្ចីម៉ូតូចំនួន ០១គ្រឿងធុនហុងដាប៊ីតC១១០ សេរីឆ្នាំ២០២២ ពណ៌ស ពាក់ផ្លាកលេខ តាកែវ ១AA-០៦៧២ របស់ជនរងគ្រោះឈ្មោះ វ៉ែន វស្នា ភេទប្រុស អាយុ ៣២ឆ្នាំ មានទីលំនៅភូមិតាស៊ូ ឃុំត្រពាំងសាប ស្រុកបាទី ខេត្តតាកែវ កាលពីថ្ងៃទី១៦ ខែតុលា ឆ្នាំ ២០២៤ វេលាម៉ោង ១៣ និង ៣០ នាទី ថាជិះទៅមើលម៉ូតូខូចនៅផ្ទះជាងម៉ូតូសន្ទុះ រួចហើយក៏ជិះម៉ូតូដែលមានភិនភាគខាងលើទៅបាត់មិនឃើញយកត្រឡប់មកសងវិញទេ ។ រហូតដល់ថ្ងៃទី២៨ ខែតុលា ឆ្នាំ២០២៤ វេលាម៉ោង ០៨ និង ៣០ នាទី កម្លាំងជំនាញនគរបាលព្រហ្មទណ្ឌ នៃអធិការដ្ឋាននគរបាលស្រុកបាទី សហការជាមួយកម្លាំងប៉ុស្តិ៍នគរបាលរដ្ឋបាលចោមចៅ២ អធិការដ្ឋាននគរបាលខណ្ឌពោធិ៍សែនជ័យ នៃស្នងការដ្ឋាននគរបាលរាជធានីភ្នំពេញ បានដកហូតវត្ថុតាងម៉ូតូចំនួន ០១គ្រឿងធុនហុងដាប៊ីតC១១០ សេរីឆ្នាំ២០២២ ពណ៌ស ពាក់ផ្លាកលេខ តាកែវ ១AA-០៦៧២ មានលេខតួ CH១១០C-៩០៨២៣៩៧ និងលេខម៉ាស៊ីន JF៩៦E៩០៣៧៧៨០(គ្មានខោអាវ) ដែលជនសង្ស័យយកទៅផ្លុងចោលនៅលើផ្លូវវ៉េងស្រេង ទល់មុខផែនស្ងួន សូ ងួន ស្ថិតនៅភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ដោយមានការសង្ស័យក៏ត្រូវបានកម្លាំងប៉ុស្តិ៍នគរបាលរដ្ឋបាលចោមចៅ២ យកទៅរក្សាទុកនៅប៉ុស្តិ៍នគរបាលរដ្ឋបាលចោមចៅ២ និងបានប្រគល់មកឪ្យកម្លាំងជំនាញនគរបាលព្រហ្មទណ្ឌ នៃអធិការដ្ឋាននគរបាលស្រុកបាទី ដើម្បីប្រគល់ជូនម្ចាស់ដើមវិញតែម្តង ។
ជនសង្ស័យខាងលើ កម្លាំងជំនាញបានកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ៕