បុរសជាប្តី បើករថយន្តមួយគ្រឿង ឆ្ពោះទៅកាន់ផ្សារដើមគ ដើម្បីដឹកអម្ពិលទុំ និងបន្លែយកទៅឱ្យប្រពន្ធលក់នៅផ្សារអូដឹម ខណៈបើករថយន្តមកដល់ចំណុចភ្លើងស្តុបទឹកល្អក់ បុរសជាប្តីនោះបានគាំងបេះដូងស្លា..ប់ភ្លាមៗ ចំណែករថយន្តបានឈប់នៅកណ្តាលផ្លូវ

ភ្នំពេញ៖ កាលពី ថ្ងៃទី១៣ ខែវិច្ឆិកា ឆ្នាំ២០២៤ នៅចំណុចភ្លើងស្តុបទឹកល្អក់ តាមបណ្តោយមហាវិថីកម្ពុជាក្រោម ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
បុរសជាប្តីមានជំងឺមហារីកបេះដូងបានបើករថយន្តមួយគ្រឿង ឆ្ពោះទៅកាន់ផ្សារដើមគ ដើម្បីដឹកអម្ពិលទុំ និងបន្លែយកទៅឱ្យប្រពន្ធលក់នៅផ្សារអូដឹម ខណៈបើករថយន្តមកដល់ចំណុចភ្លើងស្តុបទឹកល្អក់ ផ្លូវកម្ពុជាក្រោម បុរសជាប្តីនោះបានគាំងបេះដូងស្លាប់ភ្លាមៗ ចំណែករថយន្តបានឈប់នៅកណ្តាលផ្លូវតែម្តង។

ជនរងគ្រោះជាប្តីនោះមានវ័យប្រមាណជា៤០ឆ្នាំ មានជំងឺមហារីកបេះដូង មុខរបរដឹកអីវ៉ាន់ បន្លែផ្លែឈើឱ្យប្រពន្ធលក់ដូរនៅផ្សារអូដឹម។

មុនពេលកើតហេតុគេឃើញជនរងគ្រោះបើករថយន្តមួយគ្រឿងម៉ាក សាំងយ៉ុង ពណ៌ស្លែ ពាក់ស្លាកលេខ ភ្នំពេញ2Q-6180 បើកបរតាមបណ្តោយមហាវិថីកម្ពុជាក្រោមក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែរថយន្តរបស់ជនរងគ្រោះបានឈប់នៅកណ្តាលផ្លូវ ពេលនោះប្រជាពលរដ្ឋបាននាំគ្នាទៅមើល ក៏បានឃើញជនរងគ្រោះកំពុងគាំងបេះដូងស្លេកមុខស្លេកមាត់រហូតដាច់ខ្យល់ស្លាប់ភ្លាមមួយរំពេចតែម្តង ដោយគ្មាននរណាម្នាក់ជួយគាត់បាននោះទេ។

ស្ត្រីជាប្រពន្ធបានបញ្ជាក់ថា ប្តីរបស់គាត់មានជំងឺមហារីកបេះដូង សព្វថ្ងៃប្រកបរបរលក់បន្លែផ្លែឈើនៅផ្សារអូដឹមរៀងរាល់វេលាម៉ោង ២ ឬ ៣ទៀបភ្លឺ ប្តីរបស់គាត់តែងបើករថយន្តទៅផ្សារដើមគដើម្បីលើកបន្លែ និងអម្ពិលទុំ ដើម្បីយកឱ្យគាត់ជាប្រពន្ធលក់ដូរនៅផ្សារអូដឹមជារៀងរាល់យប់។ នៅយប់កើតហេតុនេះ ប្តីរបស់គាត់បានចេញពីផ្ទះដោយបើករថយន្តមកដឹកបន្លែដូចសព្វដង តែមិនយូរប៉ុន្មានផងស្រាប់តែមានគេទំនាក់ទំនងតាមរយៈប្រព័ន្ធទូរស័ព្ទមកថា ប្តីរបស់គាត់បានគាំងបេះដូងស្លាប់នៅតាមផ្លូវហើយ។ កម្លាំងសមត្ថកិច្ចបានចុះមកដល់ចំណុចកើតហេតុ រួចធ្វើលិខិតប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕