ជើងខ្លាំង Sinner ជ្រោមជ្រែងអ៉ីតាលី ឈានទៅវគ្គ ៤ក្រុមកម្មវិធី Davis Cup 2024

(ម៉ាឡាកា)៖ តារា Tennis ឆ្នើមលំដាប់លេខ១ ពិភពលោកបច្ចុប្បន្ន Jannik Sinner បានរួមចំណែកជួយក្រុមជម្រើសជាតិអ៉ីតាលី ឡើងទៅកាន់វគ្គពាក់កណ្តាលផ្តាច់ព្រ័ត្រនៃពានរង្វាន់ Davis Cup 2024 ដែលមានអេស្ប៉ញធ្វើម្ចាស់ផ្ទះ។
ពីគេហទំព័រកីឡា BBC បានចេញផ្សាយថា កីឡាករដែលមានវ័យទើបតែ ២៣ឆ្នាំរូបនេះ បានជួយអាសូរីវាយបកយកជ័យជម្នះលើគូប្រជែងអាហ្សង់ទីន ដើម្បីឡើងទៅប៉ះអូស្រ្តាលីពីក្នុងវគ្គ ៤ក្រុមបន្ត គ្រាដែលក្រុមនៅអឺរ៉ុប ២ផ្សេងទៀត រួមមានអាល្លឺម៉ង់ និងហូឡង់ ត្រូវប៉ះគ្នាក្នុងវគ្គចាញ់-ធ្លាក់នេះដែរ។
ក្នុងប្រកួតនោះដែរ Sinner បានចាប់ដៃគូជាមួយ Matteo Berrettini វិញ្ញសាវាយគូបុរស ២-២ យកឈ្នះលើគូប្រជែង Andres Molteni និង Maximo Gonzalez ក្រោមលទ្ធផល ២-០ នៃលំដាប់ពិន្ទុ ៦-៤ និង ៧-៥ បន្ទាប់ពីវិញ្ញាសាវាយទោលចាញ់ នៅឯទីលានដែលស្ថិតក្នុងទីក្រុង Malaga។
តាមរយៈលទ្ធផលនេះដែរ បានធ្វើឱ្យអ៉ីតាលី ដែលជាក្រុមការពារតំណែងជើងឯក Davis Cup 2023 ត្រូវប្រឈមមុខជាមួយសត្រូវចាស់កាលពីឆ្នាំទៅ អូស្រ្តាលី បន្ទាប់ពីក្រុមនៅអាស៊ីមួយនេះបានយកឈ្នះសហរដ្ឋអាមេរិក ២-១ កាលពីព្រឹកថ្ងៃព្រហស្បតិ៍ពីក្នុងវគ្គ ៨ក្រុម៕