អ៉ីតាលី ឡើងទៅប្រជែងពាន Davis Cup ជាមួយនឹងហូឡង់រាត្រីនេះ ក្រោយទម្លាក់ក្រុមអាស៊ី អូស្រ្តាលី

(ម៉ាឡាកា)៖ ម្ចាស់ការពារតំណែងជើងឯក Davis Cup ឆ្នាំចាស់ អាសូរីអ៉ីតាលី នឹងត្រូវប្រឈមមុខដាក់គ្នាទល់នឹងទឹកក្រូចហូឡង់សម្រាប់ផ្តាច់ព្រ័ត្រយប់នេះ នៅប្រទេសអេស្ប៉ាញ បន្ទាប់ពីទម្លាក់គូប្រជែងអូស្រ្តាលីរួចមក។
ពីគេហទំព័រកីឡា BBC បានចេញផ្សាយថា អ៉ីតាលី ដែលមានវត្តមានកីឡាករលំដាប់លេខ១ ពិភពលោក Jannik Sinner និង Matteo Berrettini បានរួមដៃគ្នាជួយអ៉ីតាលី ឆ្លងចូលវគ្គផ្តាច់ព្រ័ត្រ Davis Cup 2024 តាមរយៈយកឈ្នះអូស្រ្តាលី ២-០ បញ្ចប់វគ្គពាក់កណ្តាលផ្តាច់ព្រ័ត្រនាយប់មិញនេះក្នុងទីលានស្ថិតក្នុងទីក្រុង Malaga។
គួររំលឹកផងថា Matteo Berrettini ពុំបានចូលរួមជាមួយអាសូរីឡើយកាលឆ្នាំ២០២៣ ដោយសារបញ្ហារបួស។
Sinner ដែលជាម្ចាស់ជើងឯកពានដល់ទៅ២ ក្នុងកម្រិត Grand Slam រដូវកាលនេះ បានបន្តភាពខ្លាំងរបស់ខ្លួន ដោយបានយកឈ្នះ Alex de Minaur ក្រោមលទ្ធផល ៦-៣ និង ៦-៤ ក្រោយពេលមិត្តរួមជាតិ Berrettini បានធ្វើការវាយបកយកជ័យជម្នះទៅលើ Thanasi Kokkinakis ៦-៧ (៦-៨) ៦-៣ និង ៧-៥ សម្រាប់វិញ្ញាសាវាយទោលដូចគ្នា។
អ៉ីតាលី នឹងត្រូវប៉ះហូឡង់នៅរាត្រីថ្ងៃអាទិត្យនេះតែម្តង ក្រោយពេលក្រុម Tennis ផ្នែកនារីរបស់ពួកគេ ក៏បានគ្រងតំណែងជើងឯកពាន Billie Jean King Cup ក្នុងកម្មវិធីនេះដែរ កាលពីដើមសប្តាហ៍នេះរួចហើយ៕