គ្រោះថ្នាក់ចរាចរណ៍ រវាងរថយន្តស៊េរីទំនើប PORSCHE បើកវ៉ាជ្រុលបុក LEXUS RX330 រងការខូចខាតយ៉ាងដំណំ

ហេតុការណ៍នេះកើតឡើងកាលពី យប់ ថ្ងៃទី ២៦ ខែវិច្ឆិកា ឆ្នាំ ២០២៤ ទល់មុខបុរីជីបម៉ុងលែន ផ្លូវ ៦០ ម៉ែត្រ សង្កាត់ជើងឯក ខណ្ឌដង្កោ។ រថយន្តស៊េរីទំនើបមួយគ្រឿង ម៉ាក PORSCHE បើកបរក្នុងល្បឿនលឿន វ៉ាជែងជ្រុលទៅបុករថយន្ត LEXUS RX330 បើកបញ្ច្រាសទិសគ្នាពេញទំហឹង បណ្ដាលឲ្យរងការខូចខាតរថយន្តទាំងសងខាង។

មុនពេលកើតហេតុគេបានឃើញរថយន្តជនជាតិចិន ម៉ាក PORSCHE ពណ៌ខ្មៅ ពាក់ស្លាកលេខភ្នំពេញ 2AL-0080 បានបើកធ្វើដំណើរតាមបណ្ដោយផ្លូវ ៦០ ម៉ែត្រ ទិសដៅពីជើងទៅត្បូងក្នុងល្បឿនលឿន ហើយវ៉ាជែងជ្រុលទៅបុកនឹងរថយន្ត LEXUS RX300 ពណ៌ស ពាក់ស្លាកលេខ ភ្នំពេញ 2AS 0919 ធ្វើដំណើរបញ្ច្រាសទិសគ្នា បណ្តាលឲ្យរថយន្ត LEXUS រងការខូចខាតផ្នែកខាងមុខចំហៀងខាងឆ្វេង ហើយមនុស្សរបួសតិចតួច ។ ចំណែករថយន្ត PORSCHE វិញ រងការខូចខាតខ្ទេចផ្នែកខាងមុខចំហៀងខាងឆ្វេង ដាច់កង់មុខ ព្រមទាំងធ្វើឲ្យបុរសជនជាតិចិនអ្នកបើកបររងរបួសបែកក្បាល។ សមត្ថកិច្ចជំនាញផ្នែកចរាចរណ៍ធ្វើការវាស់វែងយករថយន្តទៅរក្សាទុក រង់ចាំភាគីទាំងសងខាងមកដោះស្រាយគ្នាពេលក្រោយ ដើម្បីបញ្ចប់រឿង៕