បុរសម្នាក់ បើករថយន្តមួយគ្រឿង រេចង្កូតបុកស្លាកប៉ាណូអស់ ០២ ដើម និងរបងដីឡូត៍ពលរដ្ឋរងការខូចខាត

កាលពី ថ្ងៃទី ២៥ ខែធ្នូ ឆ្នាំ ២០២៤ ទល់មុខសណ្ឋាគារសម្បត្តិមានហេងបី តាមបណ្ដោយផ្លូវជាតិលេខ ០១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានបានបញ្ជាក់ថា រថយន្តប្រភេទកូរ៉េដឹកទំនិញធុនធំ ០១ គ្រឿង ខណៈអ្នកបើកបរងោកមួយភាំង បណ្ដាលឲ្យរេចង្កូតឡើងលើសួនច្បារពុះចែកទ្រូងផ្លូវ ហើយជ្រុលបុកស្លាកប៉ាណូបាក់អស់ ០២ ដើម រួចបន្តទៅបុកចូលរបងដីឡូត៍របស់ប្រជាពលរដ្ឋបាក់រងការខូចខាតថែមទៀត។

មុនពេលកើតហេតុគេបានឃើញបុរសម្នាក់ បើករថយន្តប្រភេទកូរ៉េដឹកទំនិញធុនធំ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម 3A-7002 ធ្វើដំណើរតាមបណ្ដោយផ្លូវជាតិលេខ ០១ ទិសដៅពីលិចទៅកើត ក្នុងល្បឿនលឿន។ លុះមកដល់ចំណុចកើតហេតុ អ្នកបើករថយន្តបានងោកមួយភាំង ធ្វើឲ្យរថយន្តរេចង្កូតឡើងលើសួនច្បារពុះចែកទ្រូងផ្លូវ ក៏ជ្រុលបុកនឹងស្លាកប៉ាណូផ្សព្វផ្សាយពាណិជ្ជកម្មបាក់អស់ចំនួន ០២ ផ្ទាំង។ ពេលនោះរថយន្តបង្ក ក៏រេចង្កូតទៅផ្លូវម្ខាងទៀត ជ្រុលបុកដើមឈើ និងរបងដីឡូត៍របស់ប្រជាពលរដ្ឋបាក់ខូចខាតអស់មួយចំនួន រួមទាំងដើមក្រខុប ០១ ដើម ផងដែរ។ ភ្លាមៗ នោះដែរ អ្នកបើកបរបានរ៉ឺយ៉ែរថយន្តថយក្រោយ ហើយព្យាយាមបើករត់គេចទាំងរថយន្តរងការខូចខាតផ្នែកខាងមុខរហូតដល់ជិតវត្តជ្រោយអំពិល ផ្លូវជាតិលេខ ០១ សង្កាត់ក្បាលកោះ ខណ្ឌច្បារអំពៅ ទើបសមត្ថកិច្ចសហការគ្នាដេញឃាត់បានរថយន្ត ក៏ដូចជាអ្នកបើកបរ។
ក្រោយកើតហេតុ រថយន្តត្រូវសមត្ថកិច្ចប្រគល់ឲ្យជំនាញចរាចរណ៍ផ្លូវគោកទៅវាស់វែងរក្សាទុក រង់ចាំដំណោះស្រាយ៕