ស្ពានបេតុងថ្មី២កន្លែង កសាងទៅកាន់រមណីយដ្ឋានទេសចរណ៍លើភ្នំគីរីរម្យ នឹងដាក់ឲ្យដំណើរការមុនចូលឆ្នាំប្រពៃណីខ្មែរ

(កំពង់ស្ពឺ)៖ អភិបាលខេត្តកំពង់ស្ពឺ បានដឹកនាំប្រធានមន្ទីរ អង្គភាព ជុំវិញខេត្តចុះពិនិត្យវឌ្ឍនភាពនៃការស្ថាបនា កសាងស្ពានថ្មី២កន្លែង និងចាក់បេតុងតាមបណ្តោយផ្លូវជាតិ៤៦ តភ្ជាប់ពីផ្លូវជាតិលេខ៤ទៅកាន់ឧទ្យានជាតិគីរីរម្យ ស្ថិតនៅក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ នៅថ្ងៃទី១៥ ខែមករា ឆ្នាំ២០២៥។
ក្នុងពេលនោះ លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានលើកឡើងថា ប្រទេសជាតិមានសុខសន្តិភាព ស្ថិរភាពនយោបាយ ជាឱកាសមាសដើម្បីឱ្យក្រសួង ស្ថាប័នមន្ទីរ មានឱកាសក្នុងកសាងប្រព័ន្ធហេដ្ឋារចនាសម្ព័ន្ធឱ្យបានល្អ ។ ហើយបើគ្មាន សុខសន្តិភាព ស្ថិរភាពនយោបាយនោះទេ ក្រសួង ស្ថាប័ន មន្ទីរ ក៏ដូចអាជ្ញាធរ គ្មានឱកាសក្នុងការស្ថាបនានិងអភិវឌ្ឍន៍ឱ្យមានការរីកចម្រើនឡើយ ហើយប្រជាពលរដ្ឋក៏មានពេលវេលាក្នុងការរកស៊ីទទួលទាននោះដែរ។

លោក ស៊ូ សុន្ទរ៉ា ប្រធានមន្ទីរសាធារណៈការ និងដឹកជញ្ជូនខេត្តកំពង់ស្ពឺ ឲ្យដឹងពីគំរោងសាងសង់ដូច្នេះថា គម្រោងការងារស្ថាបនាស្ពានបេតុង ចំនួន ២កន្លែងស្ពានទី១ ប្រវែង ១ម៉ែត្រ ទទឹង៩ម៉ែត្រ ត្រង់គីឡូម៉ែត្រ១៤+១០០ ភូមិសាស្ត្រ ស្ពានអូរ កសេះស្ពានទី២ ប្រវែង ៣៦ម៉ែត្រ ទទឹង ៩ម៉ែត្រ ត្រង់គីឡូម៉ែត្រ២២+៥០០ ស្ថិតក្នុងភូមិសាស្ត្រ ស្ពានអូរ តាសេកនិងស្ថាប នាផ្លូវតភ្ជាប់ក្បាលស្ពានចំនួន២កន្លែង ដោយក្រាលកៅស៊ូ DBST ប្រវែងសរុប ២០០ម៉ែត្រ ទទឹង ៧ម៉ែត្រ និងចិញ្ចើមដី ល្បាយថ្ម ទទឹង ០,៥ម៉ែត្រ សងខាង លើកំណាត់ផ្លូវជាតិលេខ ៤៦ ស្ថិតនៅក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ បានចាប់ផ្តើមបើកការដ្ឋានស្ថាបនាកាលពីថ្ងៃទី២៧ ខែ សីហា ឆ្នាំ២០២៤ ហើយគិតមកដល់ថ្ងៃទី១៥ ខែ មករា ឆ្នាំ២០២៥នេះ លទ្ធផលនៃការងារសាងសង់នេះ សម្រេចបាន ៨០,៦០%ហើយ៕