ជីតា និងចៅស្រីម្នាក់ បានស្លា..ប់ រីឯចៅប្រុសតូច០២នាក់ទៀត បានរងរបួសធ្ង..ន់ ករណីគ្រោះថ្នាក់ចរាចរណ៍

ខេត្តបាត់ដំបង ៖ កាលពីល្ងាចថ្ងៃទី២២ ខែមករា ឆ្នាំ២០២៥នេះ ជីតា និងចៅស្រីម្នាក់ បានស្លា.ប់ រីឯចៅប្រុសតូច០២នាក់ទៀត បានរងរបួសធ្ងន់ នៅពេល ជីតាជិះម៉ូតូឌុបចៅៗរបស់គាត់ដើរលេង ហើយក៏ត្រូវរថយន្តស៊េរីទំនើប មួយគ្រឿង ដែលជិះដោយជនជាតិចិន បុកពេញទំហឹងពីក្រោយ នៅលើកំណាត់ផ្លូវហាយវេ ត្រង់ចំណុចភូមិច្រាបក្រសាំង សង្កាត់វត្តគរ ក្រុងបាត់ដំបង ។

ជនរងគ្រោះមានគ្នា០៤នាក់ បានជិះម៉ូតូរួមគ្នា ១គ្រឿង ដែលមានជីតាឈ្មោះ ទូច អាយុប្រហែល៧០ឆ្នាំ រស់នៅភូមិ ឃុំកើតហេតុ ជាអ្នកឌុបចៅប្រុសស្រីចំនួន០៣នាក់ទៀត ។ ប្រភពដដែល បានផ្ដល់ព័ត៌មានបឋមថា ជីតាបានឌុបចៅៗចេញពីផ្ទះដើរលេង លើកំណាត់ផ្លូវហាយវេ ពីលិចឆ្ពោះទៅខាងកើត លុះដល់ចំណុចកើតហេតុ ក៏ត្រូវរថយន្តស៊េរីទំនើបមួយគ្រឿង បើកយ៉ាងលឿន មកបុកពីក្រោយពេញទំហឹង បណ្ដាលជីតា និងចៅៗ ប៉ើងរប៉ាត់រប៉ាយពេញផ្លូវ។ គេឃើញ ជីតា និងចៅស្រី បានស្លា.ប់ភ្លាមៗ រីឯចៅប្រុសគាត់០២នាក់ទៀត រងរបួសយ៉ាងធ្ងន់ធ្ងរ ។
ប្រភពដដែល បានអោយដឹងបន្តថា ដោយឡែកភាគីរថយន្តវិញ រថយន្តបង្កម៉ាកឡិចស៊ីសLM ពណ៏ខ្មៅ ស្លាកលេខភ្នំពេញ 2CG-7888 ដែលខូចខាតខាងមុខ ផ្នែកខាងស្ដាំ ។ បន្ទាប់ពីកើតហេតុ រថយន្តនេះ បានឈប់ហើយគេឃើញមានជនបរទេស ដែលគេសង្ស័យជាជនជាតិចិនប៉ុន្មាននាក់ បានចុះឈរមើលរថយន្តខ្លួន ហើយបន្តិចក្រោយមក សមត្ថកិច្ចក៏បានចុះទៅដល់ភ្លាមៗដែរ ។

ប្រភពព័ត៌មានបានឲ្យដឹងទៀតថា អ្នកធ្វើដំណើរទាំងអស់នៅក្នុងរថយន្តនោះ ក៏មានអ្នកបើកបរថយន្តនេះដែរ ដែលត្រូវសមត្ថកិច្ចឃាត់ខ្លួន នាំទៅកាន់ស្នងការខេត្ត។ ទាំងនេះគ្រាន់តែជាព័ត៌មានបឋមនៅកន្លែងកើតហេតុប៉ុណ្ណោះ រីឯរឿងរ៉ាវជាក់លាក់យ៉ាងណានោះ ពេលនេះរង់ចាំមន្ត្រីជំនាញ ចុះពិនិត្យវាស់វែង និងសួរនាំភាគីទាំងពីរសិន ៕