ឃាត់ខ្លួនក្មេ…ងទំនើង ១០នាក់ បង្ហោះម៉ូតូលើផ្លូវសាធារណៈ និងរក្សាទុកម៉ូតូ ០២គ្រឿង រយៈពេល ០៣ខែ

កំពង់ឆ្នាំង: នៅថ្ងៃទី ១២ ខែកុម្ភៈ ឆ្នាំ ២០២៥ កម្លាំងសមត្ថកិច្ចខេត្តកំពង់ឆ្នាំង បានអនុវត្តតាមបទបញ្ជាយ៉ាងម៉ឺងម៉ាត់ របស់លោកឧត្តមសេនីយ៍ទោ តេង ច័ន្ទណាត ស្នងការនគរបាលខេត្តកំពង់ឆ្នាំង ដោយសហការជាមួយកម្លាំងជំនាញព្រហ្មទណ្ឌ និងអធិការដ្ឋានស្រុករលាប្អៀរ បានចុះស្រាវជ្រាវស៊ើបអង្កេត ករណីក្មេងជិះម៉ូតូបង្ហោះលើផ្លូវសាធារណៈ។

លទ្ធផលឃាត់ខ្លួនក្មេងទំនើងចំនួន ១០ នាក់ និងម៉ូតូចំនួន ៩ គ្រឿង ដែលមានករណីបង្ហោះម៉ូតូពិតប្រាកដ។ ពួកគេបានសារភាពថា កាលពីថ្ងៃទី ៣០ ខែមករា ឆ្នាំ ២០២៥ វេលាម៉ោង ១៧:៣០នាទី ពួកគេបានជិះម៉ូតូតំរៀបលើផ្លូវថ្នល់ជាតិ ដើម្បីថតរូប និងថតជាវីដេអូ ខណៈពេលដែលមាន ២ នាក់ក្នុងចំណោមពួកគេ បានធ្វើអំពើបង្ហោះម៉ូតូ។

សមត្ថកិច្ចបានយកក្មេងទាំង ១០ នាក់ មកធ្វើការអប់រំ និងដាក់វិន័យតាមរដ្ឋបាល។ ក្នុងនោះ មានម៉ូតូចំនួន ០២ គ្រឿង ត្រូវបានរក្សាទុករយៈពេល ០៣ ខែ។
សូមជម្រាបជូនថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បទបញ្ជាដ៏ម៉ឺងម៉ាត់ ក្នុងការបង្ក្រាបក្រុមក្មេងទំនើង និងការជិះម៉ូតូបង្ហោះនៅលើផ្លូវសាធារណៈ។ គ្រប់ករណីបង្ហោះម៉ូតូលើកទីមួយ នឹងត្រូវឃាត់យកម៉ូតូរក្សាទុករយៈពេល ៣ ខែ ខណៈដែលការប្រព្រឹត្តលើកទីពីរ នឹងមានការរឹតត្បិតបន្ថែម។
សមត្ថកិច្ចបញ្ជាក់ផងដែរថា ពលរដ្ឋគួរតែអនុលោមតាមច្បាប់ចរាចរណ៍ផ្លូវគោក និងចៀសវាងអំពើបំពាន ដែលអាចនាំអោយមានហានិភ័យចំពោះសុវត្ថិភាពផ្លូវគោក ៕