បុគ្គលិកបើករថយន្តដឹកប្រេងម្នាក់ ត្រូវបានកម្លាំងនគរបាលស្រុករតនមណ្ឌល ឃាត់ខ្លួន បន្ទាប់ពីរកឃើញពាក់ព័ន្ធករណី លួចប្រេងសាំងរបស់ក្រុមហ៊ុន

ខេត្តបាត់ដំបង៖ មន្ត្រីនគរបាលស្រុករតនៈមណ្ឌលបានឲ្យដឹងថ្ងៃទី១៨ខែមីនានេះថា បុគ្គលិកបើករថយន្តដឹកប្រេងម្នាក់ ត្រូវបានកម្លាំងនគរបាលស្រុករតនមណ្ឌល ធ្វើការឃាត់ខ្លួន បន្ទាប់ពីរកឃើញពាក់ព័ន្ធករណីលួចប្រេងសាំងរបស់ក្រុមហ៊ុន។
ហេតុការណ៍នេះលួចប្រេងបានកើតឡើងកាលពីថ្ងៃទី ១៥ ខែមីនា ឆ្នាំ២០២៦ នៅចំណុចក្រុមទី០១ ស្ថិតក្នុងភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង។ ជនសង្ស័យមានឈ្មោះ ហៀក អុីហុង ភេទប្រុស អាយុ៣២ឆ្នាំ មានទីលំនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង មុខរបរជាបុគ្គលិកបើករថយន្តដឹកប្រេង។
ក្រោយទទួលពាក្យបណ្តឹងពីជនរងគ្រោះឈ្មោះ ឈឿត គឹមលាង ភេទស្រី អាយុ២២ឆ្នាំ ជាបុគ្គលិកផ្នែកគណនេយ្យ ដែលតំណាងឲ្យស្ថានីយ៍ប្រេងឥន្ធនៈ “លឹម អ៊ូ ត្រែង” កម្លាំងសមត្ថកិច្ចបានចាប់ផ្តើមស្រាវជ្រាវយ៉ាង សកម្ម តាមបទបញ្ជាដ៏តឹងរឹងពីថ្នាក់ដឹកនាំ។
លទ្ធផលនៃការស្រាវជ្រាវ រហូតដល់ថ្ងៃទី១៦ ខែមីនា ឆ្នាំ២០២៦ វេលាម៉ោង១៤និង១០នាទី សមត្ថកិច្ចបានឈានដល់ការឃាត់ខ្លួនជនសង្ស័យខាងលើ នាំមកសាកសួរនៅអធិការដ្ឋាននគរបាលស្រុករតនមណ្ឌល។
ជនសង្ស័យបានសារភាពថា ខ្លួនពិតជាបានធ្វើសកម្មភាពលួចយកប្រេងសាំងចំនួន៣ ប៊ីដុងកន្លះ ស្មើនឹង ១១៤លីត្រ ពិតប្រាកដមែន ខណៈសម្ភារៈបាត់បង់សរុបមានចំនួនដល់ទៅ ៥០៥លីត្រ។
ជនសង្ស័យត្រូវបានកម្លាំងនគរបាលស្រុករតនមណ្ឌល សាងសំណុំរឿងបញ្ជូនទៅការិយាល័យជំនាញខេត្ត ដើម្បីបន្តចាត់ការតាមនីតិវិធីច្បាប់៕