ចំនួនអ្នកស្លាប់ពីរញ្ជួយដីនៅឥណ្ឌូនេស៊ី ឡើងដល់ជិត៧០នាក់ និងរាប់ពាន់នាក់គ្មានផ្ទះសម្បែង

មនុស្សរាប់ពាន់នាក់នៅតែរង់ចាំជំនួយនៅលើកោះ Flores ប្រទេសឥណ្ឌូនេស៊ីកាលពីថ្ងៃចន្ទ១៧សីហាដើមសប្ដាហ៍នេះ ប៉ុន្មានថ្ងៃបន្ទាប់ពីការរញ្ជួយដីដ៏ខ្លាំងក្លាមួយបានសម្លាប់មនុស្សយ៉ាងហោចណាស់ ៦៨ នាក់ របួសជាង ២០០ នាក់ និងបំផ្លាញផ្ទះរាប់រយខ្នង និងអគារផ្សេងៗទៀត។
ប្រជាពលរដ្ឋជាច្រើននៅលើកោះ Flores ក្នុងខេត្ត East Nusa Tenggara បានចំណាយពេលពេញមួយថ្ងៃដើម្បីកាន់ទុក្ខជនរងគ្រោះ និងរង់ចាំជំនួយមកដល់សហគមន៍ដែលនៅតែត្រូវបានកាត់ផ្តាច់ដោយសាររញ្ជួយដីដ៏សាហាវកម្រិត ៧,៧ រ៉ិចទ័រ។ ការរញ្ជួយដីនេះបានបន្សល់ទុកនូវការខូចខាតយ៉ាងទូលំទូលាយ ដោយអគារបានដួលរលំលើរថយន្តកំពុងចត ផ្ទះបានបែកខ្ទេចខ្ទី និងដើមឈើ និងថ្មធំៗបានបិទផ្លូវជាច្រើន។ លោក Rasyid Jafar អ្នកលក់សម្លៀកបំពាក់នៅក្នុងភូមិ Reo ជាតំបន់ដែលរងគ្រោះខ្លាំងបំផុតនៅក្នុងស្រុក Manggarai បាននិយាយថា ពេលនេះផ្ទះរបស់ខ្លួនក្លាយជាគំនរបាក់បែក។ ពួកលោកត្រូវការអាហារ ថ្នាំពេទ្យ និងទឹកស្អាតជាបន្ទាន់។
ក្នុងអំឡុងពិធីបុណ្យឯករាជ្យជាតិឥណ្ឌូនេស៊ីនៅរដ្ឋធានីហ្សាកាតា លោកប្រធានាធិបតី Prabowo Subianto បានស្នើសុំឱ្យអ្នកចូលរួមបួងសួងសម្រាប់ប្រជាជនដែលរងផលប៉ះពាល់ដោយគ្រោះមហន្តរាយនៅខេត្ត East Nusa Tenggara និងតំបន់ផ្សេងទៀតនៃប្រទេសនេះ ខណៈដឹកនាំការស្ងប់ស្ងាត់ទូទាំងប្រទេសដើម្បីគោរពដល់វីរបុរសឯករាជ្យជាតិ។
ផ្ទះជាង ៤.៥០០ ខ្នង ត្រូវបានខូចខាតនៅពេលរញ្ជួយដីបានវាយប្រហារក្នុងជម្រៅ ១០ គីឡូម៉ែត្រនៅក្នុងខេត្ត East Nusa Tenggara មុនម៉ោង ៦ ព្រឹកថ្ងៃសៅរ៍ ១៥សីហា។ មនុស្សប្រហែល ១៩.០០០ នាក់ត្រូវបានបង្ខំឱ្យចូលទៅក្នុងជម្រកបណ្តោះអាសន្ន និងមនុស្ស ២១៣ នាក់បានរងរបួស នេះបើយោងតាមទីភ្នាក់ងារគ្រប់គ្រងគ្រោះមហន្តរាយជាតិ ឬ BNPB។ គ្រោះមហន្តរាយនេះក៏បានបំផ្លាញមណ្ឌលសុខភាពចំនួន ១២២ សាលារៀន២៥២ និងកន្លែងគោរពបូជាចំនួន ៨៤ ផងដែរ។ចាប់តាំងពីពេលនោះមក ក្រុមអាជ្ញាធរបានកត់ត្រារលករញ្ជួយបន្ថែមចំនួន ១.៥៧៦ លើករហូតដល់ថ្ងៃចន្ទ។ អភិបាលខេត្តបានប្រកាសដាក់ខេត្តក្នុងគ្រាអាសន្នរយៈពេល ១៤ ថ្ងៃកាលពីថ្ងៃអាទិត្យ៕