ឃាត់ខ្លួនជនសង្ស័យម្នាក់ ពាក់ព័ន្ធនឹងករណី ជួញដូរ និងរក្សាទុកសារធាតុញៀន
បន្ទាយមានជ័យ៖ អនុវត្តតាមបទបញ្ជាយ៉ាងមុឺងម៉ាត់របស់ឯកឧត្ដម នាយ ឧត្ដមសេនីយ៍ ស ថេត អគ្គស្នងការនគរបាលជាតិ និងអនុវត្តតាមបទបញ្ជាផ្ទាល់របស់ លោកឧត្ដមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យ ក្រោយមានការរាយការណ៍ពីប្រជាពលរដ្ឋល្អ ថាមានករណីជួញដូរគ្រឿងញៀនខុសច្បាប់។
នៅថ្ងៃទី១ ខែកញ្ញា ឆ្នាំ២០២៦ លោកឧត្តមសេនីយ៍ត្រី ធិន ស៊ិនដេត ស្នងការរង ផែនការងារប្រឆាំងបទល្មើសគ្រឿងញៀន បានដឹកនាំកម្លាំងការិយាល័យជំនាញប្រឆាំងគ្រឿងញៀននិងកម្លាំងជំនាញអធិការដ្ឋាននគរបាលក្រុងប៉ោយប៉ែតបានចចុះទៅដល់ចំណុចផ្ទះជួលមួយកន្លែង ស្ថិតនៅក្នុងភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យបានធ្វើការឃាត់ខ្លួនជនសង្ស័យបានចំនួន១នាក់ ជាជនជាតិចិន ។
លោកឧត្ដមសេនីយ៍ត្រី ធិន សុិនដេត ស្នងការរងផែនការងារប្រឆាំងគ្រឿងញៀន បានឱ្យដឹងថា÷កិច្ចប្រតិបត្តិការនេះលោកបានដឹកនាំកម្លាំងការិយាល័យជំនាញ និងកម្លាំងនៃអធិការដ្ឋាននគរបាលក្រុងប៉ោយប៉ែត ចុះទៅដល់ទីតាំងនិងបានឃាត់ខ្លួនជនសង្ស័យ១នាក់ ឈ្មោះ Zhang Long ភេទប្រុស អាយុ៣៨ឆ្នាំ ជាជនជាតិចិន ស្នាក់នៅក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
លោកឧត្ដមសេនីយ៍ស្នងការរង បានបញ្ជាក់ឱ្យដឹងទៀតថា÷ ក្រោយពីកម្លាំងសមត្ថកិច្ចបានធ្វើការឃាត់ខ្លួន និងឆែកឆេររកឃើញវត្ថុតាងរួមមាន៖១.ម្សៅម៉ត់ស ៤ថង់ ទម្ងន់១៣.៦០ក្រាម , ២.ក្រាមសថ្លា ចំនួន១ដុំ ទម្ងន់១៤៩.៧៧ក្រាម , ៣.ថ្នាំគ្រាប់ពណ៌ក្រហម ៣គ្រាប់,៤.ក្បាលផតខេ ១១៧គ្រាប់(គ្មានទឹក៣៧គ្រាប់) , ៥.ទូរស័ព្ទ០២គ្រឿង នឹងរថយន្តចំនួន០១គ្រឿង ។
ជនសង្ស័យ និងវត្ថុតាងត្រូវបានកម្លាំងការិយាល័យជំនាញកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីអនុវត្តតាមនិតិវិធី៕
