ឃាតកម្មទាំងគ្រួសារ ដែលបានសម្លាប់មនុស្សរហូតដល់ទៅ ៣នាក់ និងបាត់ខ្លួន២នាក់ សង្ស័យជាករណីគំនុំ

មណ្ឌលគិរី: ករណីឃាតកម្ម ដែលមិនធ្លាប់កើតមាននៅក្នុងទឹកដីនៃខេត្តមណ្ឌលគីរីនេះ បានកើតឡើង នៅថ្ងៃទី១ ខែកុម្ភៈ ឆ្នាំ២០២២ ចំណុចស្រែចោលក្នុងភូមិមេប៉ៃឃុំពូជ្រៃស្រុកពេជ្រាដាខេត្តមណ្ឌលគិរី។ សមត្ថកិច្ចជំនាញនៃខេត្តមណ្ឌលគិរីកំពុងបើកការស៊ើបអង្កេតយ៉ាងយកចិត្តទុកដាក់លើករណីឃាតកម្មទាំងគ្រួសារដែលបានសម្លាប់មនុស្សរហូតដល់ទៅ បីនាក់ និងបាត់ខ្លួន២នាក់ ដោយសមត្ថកិច្ចកំពុងជួយសង្គ្រោះកុមារម្នាក់ដែលបានរួចជីវិតពីការសម្លាប់។
នៅថ្ងៃទី៣ខែកុម្ភៈ ឆ្នំា២០២២នេះ អត្តសញ្ញាណជនរងគ្រោះទាំងអស់ត្រូវបានគេបញ្ជាក់ថា
១.ឈ្មោះ ម៉ូត ក្រាក់ ភេទប្រុស អាយុ៤៥ឆ្នាំ ជនជាតិព្នង (ស្លាប់).
២.ឈ្មោះ ក្រាក់ លី ភេទប្រុស អាយុ១៥ឆ្នាំ ជនជាតិព្នង (ស្លាប់).
៣.ឈ្មោះ នួន សំអាត ភេទប្រុស អាយុ១៥ឆ្នាំ ជនជាតិព្នង (ស្លាប់).
៤.ឈ្មោះ ក្រាក់ ស្ល៊ី ភេទប្រុស អាយុ១២ឆ្នាំ ជនជាតិព្នង (របួសធ្ងន់).
៥.ឈ្មោះ និច ស្រី ភេទស្រី អាយុ៤១ឆ្នាំ ជនជាតិព្នង(បាត់ខ្លួន).
៦.ឈ្មោះ ក្រាក់ នី ភេទប្រុស អាយុ០៥ឆ្នាំ ជនជាតិព្នង (បាត់ខ្លួន).
ជនរងគ្រោះឈ្មោះ ម៉ូត ក្រាក់ ត្រូវជនល្មើសបាញ់ត្រូវ០១គ្រាប់ ចំក្បាល ពីខាងក្រោយ ធ្លាយមកចំភ្នែកខាងឆ្វេង បណ្តាលអោយស្លាប់នៅនឹងកន្លែង រីឯជនរងគ្រោះ០២នាក់ទៀត ត្រូវបានជនល្មើសវាយនិងវត្ថុរឹង ចំផ្នែកខាងក្រោយនៃក្បាល បណ្តាលអោយស្លាប់ភ្លាមៗ, រីឯកុមារម្នាក់ទៀតរងរបួសធ្ងន់។
គិតមកដល់ថ្ងៃទី៣ កុម្ភៈនេះ សមត្ថកិច្ចនៃខេត្តមណ្ឌលគីរី នៅមិនទាន់ អាចបញ្ជាក់បាននៅឡើយទេដោយកំពុងតែមមាញឹកធ្វើការស្រាវជ្រាវកំណត់មុខសញ្ញាជនដៃដល់។ ប៉ុន្តែបើផ្អែកតាមការស្រាវជ្រាវជំហានដំបូង គេបានដាក់ការសង្ស័យករណីនេះ កើតឡើងដោយសារគំនុំ៕