គ្រោះអគ្គិភ័យឆាបឆេះផ្ទះលក់អីវ៉ាន់ចាប់ហួយខូចខាតទំនិញ និងសម្ភារៈអស់ទាំងស្រុង រួចក៏ឆេះរាលដាលទៅផ្ទះមួយទៀត ធ្វើឲ្យរថយន្ត Hilux Vigo មួយគ្រឿង ដែលចតមុខផ្ទះ ឆេះខ្ទេច

ភ្នំពេញ ៖ កាលពី ថ្ងៃទី០៣ខែ មិនា ឆ្នាំ២០២២ នៅតាមបណ្ដោយផ្លូវ KS01 ផ្ទះលេខ ២១៧ និងលេខ ២១៩ ក្នុងបុរី ពិភពថ្មី កួរស្រូវ៣ ស្ថិតក្នុងសង្កាត់រលួស ខណ្ឌដង្កោ រាជធានីភ្នំពេញ ។

នៅមុនពេលកើតហេតុ គេឃើញមានផ្សែងហុយចេញពីផ្ទះលេខ ២១៩ ដែលជាផ្ទះលក់ឥវ៉ាន់ចាប់ហួយ រួចក៏ចេញជាអណ្ដាតភ្លើង ឆាបឆេះយ៉ាងសន្ធោសន្ធៅ ធ្វើឲ្យខូចខាតសំម្ភារៈមួយចំនួនអស់ទាំងស្រុង រួចក៏រាលដាលដល់ផ្ទះមួយខ្នងទៀត ក៏ឆាបឆេះរថយន្តមួយគ្រឿងម៉ាក Hilux Vigo ពណ៍ខ្មៅ ពាក់ស្លាកលេខ ភ្នំពេញ 2BN-0902 ដែលកំពុងចតនៅផ្ទះ ឆេះខ្ទេចស្ទើរតែទាំងស្រុងផងដែរ ។
កម្លាំងខាងសន្តិសុខបុរី បាននាំគ្នាមកជួយបាញ់ពន្លត់ដោយប្រើប្រាស់ បំពង់ពន្លត់អគ្គីភ័យ អស់ជាច្រើន បំពង់ និង បានប្រើប្រាស់រថយន្តដឹកទឹកដែលប្រចាំការក្នុងបុរីអស់ ១គ្រឿងទៀត ទើបរលត់ទៅជាស្ថាពរ នៅវេលាយប់ថ្ងៃដដែល ។ ក្នុងករណីអគ្គីភ័យនេះដែរ មិនបណ្ដាលឲ្យមនុស្សរងរបួស ឬគ្រោះថ្នាក់ដល់អាយុជីវិតនោះឡើយ មូលហេតុសមត្ថកិច្ចសន្និដ្ឋានថា បណ្ដាលមកពីឆ្លងចរន្តអគ្គិសនី ៕