ភ្ញាក់ផ្អើលមួយបានកើតឡើង បន្ទាប់ពីប្រជាពលរដ្ឋ ប្រទះឃើញរថយន្តមួយគ្រឿង ជនអនាមិកយកមកកប់ចោលក្នុងដី

ការប្រទះឃើញរថយន្តដ៏ទំនើប និងថ្មីសន្លាងមួយនេះ កាលពីល្ងាចថ្ងៃទី២ ខែកុម្ភៈ ឆ្នាំ២០២២ ត្រង់ចំណុចក្នុងចម្ការដើមដូងប្រេង ក្បែរស្ពានឆ្លងទៅសាលារៀន បានណុកវ៉ាក់ ស្ថិតក្នុងភូមិ២ ឃុំសួនហ្លួង ស្រុកឈ្លើមប្រាកៀត ខេត្តនគរស៊ីថាំរ៉ាត ប្រទេសថៃ។
មានការភ្ញាក់ផ្អើលមួយបានកើតឡើង បន្ទាប់ពីប្រជាពលរដ្ឋបានប្រទះឃើញរថយន្តមួយគ្រឿងដែលជនអនាមិកយកមកកប់ចោលក្នុងដី ដោយគ្រាន់តែលេចចេញនូវដំបូល និងកាបូខាងមុខតែបន្តិចប៉ុណ្ណោះ ព្រោះដោយសារដីប៉ើងចេញនៅពេលមានភ្លៀងធ្លាក់។
ក្រោយពីទទួលបានសេចក្តីរាយការណ៍រួចមក សមត្ថកិច្ចបានដាក់អេស្កា ចុះកាយជុំវិញដើម្បីលើកយករថយន្តឡើងមកលើ ដោយសមត្ថកិច្ចគិតថា ប្រាកដជាអំពើឃាតកម្មដោយកប់ទាំងរថយន្ត និងម្ចាស់រថយន្តដើម្បីបំបាត់ដាន។
នៅពេលជីកបានជម្រៅប្រហែល ១,៥០m ហើយក៏បានទាញយករថយន្តឡើងមកលើដីរួចមក សមត្ថកិច្ចរកមើលសាកសពមនុស្សម្នាក់ក៏គ្មានដែរ ដែលបញ្ហានេះបានធ្វើអោយសមត្ថកិច្ចថៃឈឺក្បាលមិនធម្មតា ដោយរថយន្តនេះម៉ាក BMW ស៊ែរី E៤៦ គ្មានស្លាកលេខ គ្រប់កញ្ចក់ទាំងអស់ត្រូវបានគេវាយបំបែកគ្មានសល់ ដោយឡែកលេខម៉ាស៊ីនគឺ JA ៧១០០៧ ។

សមត្ថកិច្ចថៃបានសន្និដ្ឋានថា រថយន្តនេះ អាចពាក់ព័ន្ធនឹងអំពើទុច្ចរិតអ្វីមួយ ដូចជាបទល្មើសឧក្រិដ្ឋ ឬក៏ករណីជួញដូរគ្រឿងញៀនធំៗជាដើម ទើបគេយកមកកប់ចោលក្នុងដីដើម្បីបំបាត់ភស្តុតាង។ បច្ចុប្បន្នសមត្ថកិច្ចថៃកំពុងមមាញឹកក្នុងការស្វែងរកម្ចាស់រថយន្តតាមរយៈ:លេខម៉ាស៊ីនរថយន្ត និងចំណុចសំខាន់ៗមួយចំនួនទៀតដែលមិនអាចលាតត្រដាងបាន ដើម្បីយកមកសាកសួរ៕