កាស៊ីណូមួយកន្លែង ដែលមានយីហោ «សុខ គីមម៉េង» បើកឱ្យប្រជាពលរដ្ឋខ្មែរ ចូលលេងយ៉ាងគគ្រឹកគគ្រេង

ខេត្តកំពត ៖ ការអនុញ្ញាតឲ្យពលរដ្ឋខ្មែរចូលលេងកាស៊ីណូ ផ្ទុយទៅនឹងច្បាប់របស់រដ្ឋនេះ ត្រូវគេដាក់ការសង្ស័យថា អាចមានការរួមគំនិតឃុបឃិតគ្នាជាប្រព័ន្ធរបស់អាជ្ញាធរពាក់ព័ន្ធ ព្រោះថា ការបើក ឲ្យជនជាតិខ្មែរចូលលេងនេះ បានកើតឡើងជាយូរមកហើយដែរ ប៉ុន្តែគេមិនឃើញអាជ្ញាធរមានសមត្ថកិច្ចណាចុះទៅធ្វើការហាមឃាត់ ឬបង្ក្រាបនោះឡើយ។

កាស៊ីណូមួយកន្លែង ដែលមានយីហោ «សុខ គីមម៉េង» ស្ថិតនៅច្រកព្រំដែនទ្វេភាគីកម្ពុជា-វៀតណាម តន់ហន់ ស្ថិតក្នុងភូមិព្រែកក្រើស ឃុំព្រែកក្រើស ស្រុកកំពង់ត្រាច ត្រូវគេរាយការណ៍ឱ្យដឹងថា បានបើកឱ្យប្រជាពលរដ្ឋខ្មែរចូលលេងយ៉ាងគគ្រឹកគគ្រេង ក្នុងនោះគេក៏ឃើញមានទាំងឡានពាក់ស្លាកលេខ ខ.ម ថែមទៀតផង។

ចំពោះករណីនេះ សារព័ត៌មានយើងមិនអាចស្វែងរកការបំភ្លឺពីភាគីពាក់ព័ន្ធបាននៅឡើយទេ ។ យ៉ាងណាក៏ដោយ បើតាមប្រជាពលរដ្ឋរស់នៅក្នុងខេត្តកំពត ក៏បានសំណូមពរដល់ស្នងការ ក៏ដូចជាលោក ម៉ៅ ធនិន អភិបាល នៃគណៈអភិបាលខេត្តកំពត មេត្តាពិនិត្យមើលទីតាំងកាស៊ីណូនេះផង ព្រោះសកម្មភាពនេះ គឺផ្ទុយទៅនឹងច្បាប់របស់ប្រទេសកម្ពុជា ដែលមិនអនុញ្ញាតឲ្យពលរដ្ឋខ្មែរចូលលេងល្បែងនៅក្នុងកាស៊ីណូនោះទេ ពោលគឺអនុញ្ញាតឲ្យតែជនបរទេសតែប៉ុណ្ណោះ ៕