ក្មេងស្រីម្នាក់ស្លាប់ ខណៈកំពុងដើរសុខៗ ម៉ូតូជនបង្កបានបុកពេញទំហឹង បណ្តាលឱ្យក្មេងស្រីរងរបួសធ្ងន់ បញ្ជូនទៅមន្ទីរពេទ្យខេត្តស្ទឹងត្រែង តែនាងដាច់ខ្យល់ស្លាប់ទៅហើយ

ខេត្តក្រចេះ : នៅ ថ្ងៃសៅរ៍ ៤កើត ខែមាឃ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី០៥ ខែកុម្ភៈ ឆ្នាំ២០២២ ស្ថិតនៅចំណុចភូមិភ្នំខៀវ ឃុំអូរគ្រៀង ស្រុកសំបូរ ខេត្តក្រចេះ។
មុនកើតហេតុគេឃើញម៉ូតូម៉ាកសុីរ៉ូស ពណ៌ខ្មៅ ពាក់ស្លាកលេខស្ទឹងត្រែង1A-0018 បើកបរដោយបុរសម្នាក់យ៉ាងលឿនមិនប្រយ័ត្នស្របទិសគ្នា នឹងក្មេងស្រីរងគ្រោះដែលកំពុងដើរ ហើយបានបុកនាងពេញទំហឹងធ្វើប៉ើងឆ្ងាយពីម៉ូតូសន្លប់ស្តូកស្តឹង ខណ:នោះឪពុកម្តាយក្មេងរងគ្រោះក៏ប្រញាប់ដឹកក្មេងស្រីរងគ្រោះខាងលើទៅមន្ទីរពេទ្យង្អែកខេត្តស្ទឹងត្រែងដែលនៅជាប់ព្រំប្រទល់ខេត្តក្រចេះ ចំណែកជនបង្កជិះម៉ូតូខាងលើក៏រងរបួសគួរសមដែរ បច្ចុប្បន្នកំពុងសម្រាកព្យាបាលរបួសនៅមន្ទីរពេទ្យខេត្តស្ទឹងត្រែងដូចគ្នា។
ជនបង្កបើកបរម៉ូតូខាងលើមានឈ្មោះស៉ឹង សុភក្រ្ក ភេទប្រុស អាយុ៣០ឆ្នាំ រស់នៅភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង បច្ចុប្បន្នកំពុងសម្រាកព្យាបាលរបួសនៅមន្ទីរពេទ្យខេត្តស្ទឹងត្រែង។ ចំណែកក្មេងស្រីរងគ្រោះឈ្មោះអ៉ីសារ អ៊ៃយ៉ានី ជនជាតិខ្មែរអ៊ិស្លាម អាយុ៧ឆ្នាំ រស់នៅភូមិឃុំកើតហេតុខាងលើ។ ក្រោយពិនិត្យនិងធ្វើកោសល្យវិច័យរួចមក សមត្ថកិច្ចក៏បានប្រគល់សពក្មេងស្រីរងគ្រោះខាងលើទៅឱ្យក្រុមគ្រួសារធ្វើបុណ្យទៅតាមប្រពៃណី ៕