គ្រោះថ្នាក់ចរាចរ រវាងរថយន្ត និងម៉ូតូសណ្តោងរ៉ឺម៉ក បណ្តាលឱ្យមនុស្សម្នាក់ស្លាប់ និងម្នាក់ទៀតរបួសធ្ងន់

កំពង់ស្ពឺៈ កាលពី យប់ ថ្ងៃទី៧ ខែកម្ភៈ ឆ្នាំ២០២២ គ្រោះថ្នាក់ចរាចរមួយ រវាងរថយន្ត និងម៉ូតូសណ្តោងរ៉ឺម៉ក បានកើតឡើងនៅតាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ៨៦-៨៧ ក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បណ្តាលឱ្យមនុស្សម្នាក់ស្លាប់ និងម្នាក់ទៀតរបួសធ្ងន់។
មុនកើតហេតុមានរថយន្តមួយគ្រឿងម៉ាក ណាវ៉ារ៉ា ពណ៌ត្រីអ៊ី ពាក់ស្លាកលេខ ខេមរភូមិន្ទ ០២. ២-៣៦៤៨ ដែលអ្នកបើកបរមិនត្រូវបានស្គាល់អត្តសញ្ញាណទេ ព្រោះបានចុះរត់គេចខ្លួនបាត់ក្រោយកើតហេតុ។ រថយន្តនេះ បានបុកម៉ូតូសណ្តោងរ៉ឺម៉កមួយគ្រឿងម៉ាកហុងដា វ៉េវ អាល់ហ្វា ពណ៌ខ្មៅ គ្មានស្លាកលេខ បើកបរដោយឈ្មោះ វឿន ថាវិន ភេទប្រុស អាយុ២១ ឆ្នាំមានទីលំនៅភូមិទី១ ឃុំត្រែងត្រយឹង ស្រុកភ្នំស្រួច ដែលកំពុងបើកបរស្របទិសគ្នាបុកពីក្រោយបណ្តាលឲ្យស្លាប់ភ្លាមៗនៅនឹងកន្លែង។ ដោយឡែកអ្នករួមដំណើរម្នាក់ឈ្មោះ វឿន សីហា ភេទប្រុស អាយុ១៨ឆ្នាំ បានរងរបួសធ្ងន់។
សពជនរងគ្រោះនគរបាលជំនាញបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែកវត្ថុតាងយកទៅរក្សាទុកនៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនិតិវិធី ៕