អតិថិជនរបស់ក្រុមហ៊ុនបុរី វី អាយ ភី(VIP) ប្រមាណជិត ១០០នាក់ បានចេញតវ៉ាទាមទារឲ្យម្ចាស់បុរី គោរពតាមកិច្ចសន្យា
ភ្នំពេញ ៖ អតិថិជនរបស់ក្រុមហ៊ុនបុរី វី អាយ ភី(VIP) ប្រមាណជិត ១០០នាក់ បានចេញតវ៉ាទាមទារឲ្យម្ចាស់បុរី គោរពតាមកិច្ចសន្យាទិញ-លក់ ដោយសាងសង់ផ្ទះឲ្យបានទាន់ពេលកំណត់ និងសងសំណងដល់អតិថិជន តាមកិច្ចព្រមព្រៀងដែលបានចរចាកន្លងមក នៅថ្ងៃទី ០៨ ខែកុម្ភៈ ឆ្នាំ ២០២២ ។
អ្នកនាង សុខ រ៉ាធីណា ជាអតិថិជនមួយរូប ក្នុងចំណោម ៨៧រូប បានលើកឡើងថា គោលបំណងនៃការទាមទារនេះ ដោយសារភាគីម្ចាស់បុរីសន្យាជាមួយអតិថិជនហើយ តែមិនអនុវត្តតាមការព្រមព្រៀងគ្នា។ អ្នកនាង ធីណា បន្តដូច្នេះថា« ការប្រគល់ផ្ទះមិនបានតាមការព្រមព្រៀងគ្នារវាងអ្នកលក់ និងអ្នកទិញ គាត់(ម្ចាស់បុរី)សន្យា ២១ខែ តែឥឡូវបីបួនឆ្នាំហើយ មិនទាន់ប្រគល់ផ្ទះ ហើយប្លង់បំបែកក្បាលដីដែលក្រុមហ៊ុនសន្យាបំបែកជូនអតិថិជន នៅពេលផ្ទះសង់បាន ៨០% ក៏មិនបានធ្វើដែរ»។ « ពួកខ្ញុំនេះ មានបីបួនប្រភេទ អ្នកខ្លះបង់លុយដាច់ហើយ អត់ទាំងផ្ទះ អត់បានទាំងប្លង់ អ្នកខ្លះបង់រំលស់ ដល់ពេលកំណត់ដែលត្រូវទទួលបានហើយ ក៏អត់មានផ្ទះ អត់មានប្លង់ចេញឲ្យដែរ»។
សារព៍ត៌មាន បានព្យាយាមទាក់ទងលោក វ៉ន វណ្ណៈ ម្ចាស់បុរីវីអាយភី ដើម្បីសុំការឆ្លើយតបបញ្ហានេះ ប៉ុន្តែលោក បានបិទទូរស័ព្ទ។
នៅក្នុងលិខិតរបស់អតិថិជន នៅថ្ងៃទី០៨ ខែកុម្ភៈនេះ បានទាមទារឲ្យម្ចាស់ក្រុមហ៊ុន វីអាយភី ត្រូវសាងសង់ផ្ទះជូនអតិថិជន ឲ្យដូចតាមកិច្ចសន្យា ដោយបញ្ចប់ការសាងសង់គ្រប់គម្រោងទាំងអស់ (១ដល់៦) នៅចុងឆ្នាំ ២០២២នេះ និងសំណង់ត្រូវតាមមាត្រដ្ឋានប្រកបដោយគុណភាព, ត្រូវបំបែកប្លង់ក្បាលដីជូនអតិថិជនដែលបានបង់ផ្តាច់ និងប្លង់ថតចម្លងសម្រាប់អតិថិជនបង់រំលស់យកទៅសិក្សាជាមួយស្ថាប័នហិរញ្ញវត្ថុណាមួយវិញ ដែលមានអត្រាការប្រាក់ទាបជាង, ត្រូវអនុញ្ញាតចំពោះការផ្អាកបង់របស់អតិថិជន ព្រោះអតិថិជនផ្អាកបង់ដោយសារដល់សុពលភាពប្រគល់ផ្ទះ ពុំមានផ្ទះប្រគល់ជូនអតិថិជនតាមកាលកំណត់។
អ្នកតវ៉ាក៏បានទាមទារឲ្យម្ចាស់បុរីវីអាយភី ផ្តល់សំណងដល់អតិថិជនឲ្យបានត្រឹមត្រូវ ចំពោះអតិថិជនដែលក្រុមហ៊ុនពុំបានប្រគល់ផ្ទះតាមកាលបរិច្ឆេទកំណត់ក្នុងកិច្ចព្រមព្រៀង។ ពួកគេនឹងនៅតែបន្តទាមទារ ប្រសិនបើម្ចាស់បុរីគ្មានដំណោះស្រាយឲ្យបានទាន់ពេលវេលា។ ដោយអតិថិជន សង្កត់ធ្ងន់ថា បើម្ចាស់បុរីពុំអនុវត្តតាមការទាមទារនេះ មានន័យថា បុរីវីអាយភី ពិតជាមានចេតនាកុហក រំលោភលើទំនុកចិត្ត និងឆបោកទឹកប្រាក់របស់អតិថិជនពិតប្រាកដមែន។
បុរីវីអាយភី ដែលអតិថិជនកំពុងទាមទារនេះ មានទីតាំងស្ថិតនៅ ភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ៕
