នៅទីបំផុត! មុខសញ្ញាប្លន់ និងរំលោភលើកុមារី២នាក់ បងប្អូន ស្រុកអង្គរជ័យ ខេត្តកំពត ចាប់វៃខ្នោះបានហើយ

កំពត៖ នៅថ្ងៃទី៨ ខែកុម្ភៈ ឆ្នាំ២០២២ នៅទីបំផុត! មុខសញ្ញាប្លន់និងរំលោភលើកុមារី២នាក់បងប្អូននៅស្រុកអង្គរជ័យ ខេត្តកំពត កាលពីថ្ងៃទី១៨ ខែតុលាឆ្នាំ២០២១ត្រូវបានកម្លាំងនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ, កម្លាំងស្នងការដ្ឋាននគរបាលខេត្តកំពង់ស្ពឺនិងកម្លាំងអធិការដ្ឋាននគរបាលក្រុងច្បារមនចាប់ឃាត់ខ្លួននិងវ៉ៃខ្នោះបានសម្រេចហើយ បន្ទាប់ពីលោក លាង សំណាត់ បានចេញដីកាបង្គាប់ឱ្យចាប់ខ្លួនជនត្រូវចោទឈ្មោះ អ៊ុង កប ពីបទ លួចមានស្ថានទម្ងន់ទោស(គាស់ទម្លុះទម្លាយ) និងបទ រំលោភសេពសន្ថវៈ (ជនរងគ្រោះរងអាយុ១៧ឆ្នាំ) កាលពីថ្ងៃទី២៣ ខែវិច្ឆិកា ឆ្នាំ២០២១កន្លងទៅ។

ជនត្រូវចោទឈ្មោះ អ៊ុង កប ភេទប្រុស កើតឆ្នាំ១៩៩៥ ជនជាតិខ្មែរ មុខរបរធ្វើស្រែ មានទីកន្លែងកំណើតភូមិ ព្រៃទន្លេ ឃុំ ព្រែកក្រឹស ស្រុកកំពង់ត្រាច ខេត្តកំពត ត្រូវបានចោទប្រកាន់ពីបទ លួចមានស្ថានទម្ងន់ទោស(គាស់ទម្លុះទម្លាយ) និងបទ រំលោភសេពសន្ថវៈ (ជនរងគ្រោះរងអាយុ១៧ឆ្នាំ) ប្រព្រឹត្តនៅចំណុចភូមិប្រភ្នំ ឃុំប្រភ្នំ ស្រុកអង្គរជ័យ ខេត្តកំពតកាលពីថ្ងៃទី១៨ ខែតុលា ឆ្នាំ២០២១ តាមមាត្រា៣៥៣ ,៣៥៧, និងមាត្រា២៤១នៃ ច្បាប់ក្រមព្រហ្មទណ្ឌ ។ ហើយបទល្មើសដែលចោទប្រកាន់ជាបទឧក្រិដ្ឋ ដែលត្រូវផ្ដន្ទាទោសដាក់ពន្ធនាគារ។

លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពតក្នុងនាមស្នងការដ្ឋាននគរបាលខេត្តកំពត បានថ្លែងអំណរគុណចំពោះនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ, កម្លាំងស្នងការដ្ឋាននគរបាលខេត្តកំពង់ស្ពឺនិងកម្លាំងអធិការដ្ឋាននគរបាលក្រុងច្បារមនដែលបានសហការក្នុងការបន្តយកមុខសញ្ញាប្លន់និងរំលោភលើកុមារីពីរនាក់បងប្អូននៅស្រុកអង្គរជ័យ កាលពីថ្ងៃទី១៨ ខែតុលា ឆ្នាំ២០២១៕