គ្រោះថ្នាក់ចរាចរណ៍ រវាងឡិចស៊ីសមួយគ្រឿង ត្រូវរថយន្តកុងតឺន័របុក បណ្តាលឲ្យខ្ទេច ផ្នែកខាងមុខយ៉ាងដំណំ

ភ្នំពេញ: នៅ យប់ថ្ងៃទី១០ ខែកុម្ភ: ឆ្នាំ២០២២ ករណីគ្រោះថ្នាក់ចរាចរណ៍ មួយបានកើតឡើង រថយន្តឡិចស៊ីស ពណ៌ស មួយគ្រឿង ត្រូវរថយន្តកុងតឺន័របើកបុក បណ្តាលឲ្យខ្ទេចមួយកំណាត់មុខ រងការខូចខាតយ៉ាងដំណំ បង្កឲ្យមានការភ្ញាក់ផ្អើលកើតឡើង ទីតាំងកន្លែងកើតហេតុ នៅត្រង់ចំណុចម្តុំស្តុបបាគូ ស្ថិតតាមបណ្តោយផ្លូវលេខ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ ។
គ្រោះថ្នាក់ចរាចរណ៍នេះ រថយន្តម៉ាកឡិចស៊ីស (GS300) ពណ៌ស មួយគ្រឿង ខណ:ពេលដែលកំពុងបើកបរ នៅតាមបណ្តោយផ្លូវលេខ២១៧ ។ លុះពេលធ្វើដំណើរមកដល់ត្រង់ចំណុចកើត ហេតុ ស្រាប់តែមានរថយន្តកុងតឺន័រមួយគ្រឿងបើកបុក បណ្តាលឲ្យខ្ទេចផ្នែកខាងមុខរងការខូចខាតយ៉ាងដំណំតែម្តង ។ រថយន្តនេះ ក្រុមការងារនៃអង្គភាពសារព័ត៌មានយើងខ្ញុំមិនដឹងជាពាក់ស្លាកលេខប៉ុន្មាននោះទេ ដោយម្ចាស់រថយន្តបានដោះស្លាកលេខចេញបាត់ ។
វត្តមានកម្លាំងសមត្ថកិច្ចនគរបាលសង្កាត់ដង្កោ បានចុះមកដល់ទីតាំងកន្លែងកើតហេតុ ដើម្បីធ្វើការ ពិនិត្យទៅតាមនីតិវិធីផ្លូវច្បាប់ ៕