ឃា.ត់.ខ្លួន.ជ.ន.ស.ង្ស័.យ.ចំនួនពីរនាក់ពាក់ព័ន្ធករណី.ចោ.រ.ក.ម្ម.(លួ.ច.ម៉ូ.តូ.)ចំនួនពីរគ្រឿង

រតនគិរីៈ នា ថ្ងៃទី១១ ខែកុម្ភៈ ឆ្នាំ២០២២ សមត្ថកិច្ច បានឃាត់ខ្លួនជនសង្ស័យចំនួន ពីរនាក់ ពាក់ព័ន្ធ ករណីចោរកម្ម (លួចម៉ូតូ) ចំនួនពីរគ្រឿង នៅចំណុចចំការចន្ទី នៅភូមិជ្រុង ឃុំកក់ ស្រុកបរកែវ ខេត្តរតនគិរី ។ ម៉ូតូដែលចោរមានគ្នា ពីរនាក់ លួចនោះគឺ ម៉ាកហុងដា វ៉េវ ឆ្លាម ពណ៌ខ្មៅ អត់ពន្ធ អត់ស្លាកលេខ និងម៉ាក SUZUKI Raider ពណ៌ផ្ទៃមេឃ លាយក្រហម អត់ស្លាកលេខ។
ចោរមានគ្នាចំនួន ពីរនាក់ ១.ឈ្មោះ សេង ហ៊ន ភេទប្រុស អាយុ២៩ឆ្នាំ ជនជាតិខ្មែរ មុខរបរ មិនពិតប្រាកដ។ ២.ឈ្មោះ ណាត ព្រឹម ភេទប្រុស អាយុ២៨ឆ្នាំ មុខរបរ កម្មករចៀរជ័រ ។ ជនសង្ស័យទាំង ពីរនាក់ រស់នៅភូមិ ឃុំ កើតហេតុខាងលើ ។
ចំណែកជនរងគ្រោះ ឈ្មោះ រម៉ាម តូន ភេទស្រី អាយុ៤៨ឆ្នាំ ជនជាតិច្រាយ មុខរបរ កសិករ មានទីលំនៅបច្ចុប្បន្ន នៅភូមិឃុំកើតហេតុ។ ជនរងគ្រោះ ក្រោយពីបាត់ម៉ូតូ ក៏បានទូរស័ព្ទ មកប្ដឹងកម្លាំងប៉ុស្តិ៍ អោយជួយអន្ដរាគមន៍។
ភ្លាមៗ កម្លាំងប៉ុស្តិ៍នគរបាលរដ្ឋបាលកក់ បានសហការជាមួយ កម្លាំងវេន ប្រចាំបញ្ជា និងកម្លាំងជំនាញ នគរបាលព្រហ្មទណ្ឌ បាន ចុះទៅដល់កន្លែង កើតហេតុ ដើម្បីសួរនាំ ម្ចាស់ អំពីភិនភាគម៉ូតូ និងចាប់បានជនសង្ស័យ ចំនួនមួយនាក់ យកមកអធិការដ្ឋាន នគរបាលស្រុកបរកែវសួរនាំ ក៏បាន សារភាពថាខ្លួន ពិតជាបានលួចម៉ូតូ ពិតប្រាកដមែន ដោយមានគ្នា ពីរនាក់ ។ ក្រោយមក កម្លាំងជំនាញ ក៏បានស្រាវជ្រាវបន្ដ ចាប់បានម្នាក់ ទៀត។
វត្ថុតាង រួមមានម៉ូតូចំនួន ពីរគ្រឿង និងជនប្រព្រឹត្ត ទាំង ពីរនាក់ ត្រូវបានឃាត់ខ្លួន ជាបណ្ដោះអាសន្ន នៅអធិការដ្ឋាន នគរបាលស្រុកបរកែវ ដើម្បីបង្កសំណុំរឿង បញ្ជូនទៅតុលាការ តាមនីតិវិធី។ រីឯម៉ូតូប្រគល់ឱ្យទៅ ម្ចាស់វិញ៕