គ្រោះថ្នាក់ចរាចរណ៍ រវាងរថយន្តស៊េរីទំនើបម៉ាក BMW បុករថយន្តកូរ៉េដឹកពោះត្រី ហើយរុញទៅបុករបាំងថ្មបាក់អស់២កង់ ធ្វើឱ្យរថយន្តកូរ៉េក្រឡាប់ផ្ងារជើង

ភ្នំពេញ ៖ ហេតុការណ៍នេះ បង្កការភ្ញាក់ផ្អើលនិងធ្វើឱ្យកកស្ទះចរាចរណ៍ដល់អ្នកដំណើរកាលពី យប់ថ្ងៃទី១១ ខែកុម្ភៈ ឆ្នាំ២០២២ ស្ថិតនៅលើស្ពានអាកាសក្បាលថ្នល់ ក្នុងសង្កាត់ទន្លេបាសាក់ ខណ្ឌចំការមន ជាប់ព្រំប្រទល់សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

មុនកើតហេតុគេឃើញរថយន្តកូរ៉េ១តោនកន្លះ ពណ៌ខៀវ ពាក់ស្លាកលេខភ្នំពេញ 2Z-2776 ដឹកពោះត្រីឡើងពេញរថយន្ត និងធ្វើដំណើរតាមបណ្ដោយផ្លូវព្រះនរោត្ដមក្នុងទិសដៅពីជើងទៅត្បូងហើយឡើងលើស្ពានអាកាសក្បាលថ្នល់បំណងឆ្ពោះទៅផ្លូវជាតិលេខ២ តែពេល
បើកដល់កណ្ដាលស្ពានស្រាប់តែមានរថយន្តស៊េរីទំនេីបម៉ាក BMW ពណ៌ស គ្មានស្លាកលេខ បើកបរដោយបុរសម្នាក់ ធ្វើដំណើរមកពីក្រោយក្នុងល្បឿនលឿននិងមិនប្រយ័ត្នបានជ្រុលទៅបុករថយន្តកូរ៉េពីក្រោយពេញទំហឹងបណ្តាលឱ្យរថយន្តកូរ៉េរេចង្កូតទៅបុករបាំងថ្មបាក់អស់២កង់រាបដល់ដី និងក្រឡាប់ផ្ងារជើងម្ខាងចាក់ពោះត្រីពេញផ្លូវ ។

ករណីគ្រោះថ្នាក់ចរាចរណ៍នេះ មិនបណ្ដាលឱ្យមនុស្សណាម្នាក់រងរបួសនោះឡើយ តែរថយន្តបង្កហេតុនិងរថយន្តរងគ្រោះបានរងការខូចខាតយ៉ាងដំណំដូចគ្នា។
ក្រោយកើតហេតុភ្លាមៗ គេសង្កេតឃើញថា នៅត្រង់ចំណុចកើតហេតុមានការកកស្ទះចរាចរណ៍ដល់អ្នកដំណើរខ្លាំងមែនទែន សមត្ថកិច្ចមូលដ្ឋានចុះមកជួយសម្រួលចរាចរណ៍ និងទាក់ទងទៅផ្នែកជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ មកធ្វើការវាស់វែង និងស្ទួចយករថយន្តទាំងពីរគ្រឿងទៅរក្សាទុក រង់ចាំដោះស្រាយគ្នាតាមក្រោយ ៕