បុរសម្នាក់ បានស្លាប់ នៅកន្លែងកើតហេតុ ដោយសាររថយន្ត មិនស្គាល់ម៉ាក បើកបញ្ច្រាសទិសគ្នា បុកពេញទំហឹង

ភ្នំពេញៈ កាលពី ថ្ងៃ ទី១៣ ខែកុម្ភៈ ឆ្នាំ២០២២ ត្រង់ចំណុចជាប់របង រោងចក្រ តាមបណ្ដោយផ្លូវបេតុង ក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ ។ បុរសរងគ្រោះដែលស្លាប់ មានឈ្មោះ សុខ គង់ អាយុ២៧ឆ្នាំ ជនជាតិខ្មែរ មុខរបរ ជាងដែក ស្នាក់នៅក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ មានស្រុកកំណើត នៅខេត្តត្បូងឃ្មុំ។
ដំបូងឡើយ គេឃើញបុរស ជាជនរងគ្រោះ នេះ បានបើកម៉ូតូម៉ាកហុងដា ឌ្រីម សេ១២៥ ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ត្បូងឃ្មុំ 1I 3435 បានជិះតាមបណ្ដោយផ្លូវបេតុង ក្នុងទិសដៅពីទិស ខាងកើត ទៅខាងលិច ក្នុងល្បឿនមធ្យម ខណៈមកដល់ចំណុចកើតហេតុ ខាងលើ ក៏ស្រាប់តែមានរថយន្តមិនស្គាល់ម៉ាក បើកតាមបណ្ដោយផ្លូវបេតុង ក្នុងទិសដៅពីខាងលិច ទៅខាងកើត បញ្ច្រាសទិសគ្នា ក្នុងល្បឿនយ៉ាងលឿន បានមកបុកចំពីមុខ ពេញទំហឹង បណ្តាលឲ្យជនរងគ្រោះ ដួលបោកក្បាលនឹងថ្នល់ ស្លាប់ភ្លាមៗ នៅនឹងកន្លែងកើតហេតុ។
ជនរងគ្រោះ ជិះម៉ូតូចេញពី បន្ទប់ជួល ក្នុងគោលបំណង ទៅជួបសង្សារ ខណៈមកដល់ពាក់កណ្តាលផ្លូវ ក៏ជួបគ្រោះថ្នាក់ចរាចរណ៍ បណ្ដាលឲ្យស្លាប់ បែបនេះតែម្ដង។ ក្រោយពីបុកហើយ រថយន្តដែលមិនបានស្គាល់ម៉ាក បានបើករត់ ទៅទិសខាងកើត បាត់ស្រមោល ។
ចំណែកសពសមត្ថកិច្ច ធ្វើកំណត់ហេតុរួច ប្រគល់ឲ្យសាច់ញាតិ ដឹកយកទៅស្រុកកំណើត ធ្វើបុណ្យតាមប្រពៃណី៕