សិស្សសាលា២នាក់សង្ស័យដាច់លុយ បានបែកគំនិតធ្វើសកម្មភាពឆក់កាបូប ត្រូវម្ចាស់ដេញតាមនិងស្រែកថា ចោរៗ

ខេត្ដកណ្ដាល ៖ ទាក់ទិននឹងការឃាត់ខ្លួនជនសង្ស័យទាំង២នាក់នេះ ត្រូវបានសមត្ថកិច្ចឲ្យដឹងថា កាលពី ថ្ងៃទី១៦ ខែកុម្ភៈ ឆ្នាំ២០២២កន្លងទៅ ករណីឆក់កាបូបលុយ កើតឡើងនៅភូមិព្រៃតាតូច ឃុំបឹងខ្យាង ស្រុកកណ្ដាល ស្ទឹងខេត្តកណ្ដាល ។ ជនល្មើសមានគ្នា២នាក់ជិះម៉ូតូ១គ្រឿង បានឆក់កាបូបលុយរបស់ស្ត្រីឈ្មោះ មិន ស្រីទូច អាយុ៣៧ឆ្នាំ មុខរបរលក់ដូរ រស់នៅភូមិកណ្តឹងតូច ឃុំកណ្តឹង ស្រុកបាទី ខេត្តតាកែវ ។
សិស្សសាលា២នាក់សង្ស័យដាច់លុយ បានបែកគំនិតធ្វើសកម្មភាពឆក់កាបូបអ្នកដំណើរ តែត្រូវម្ចាស់ដេញតាមនិងស្រែកថាចោរៗ ក៏ត្រូវប្រជាការពារនិងនគរបាលប៉ុស្តិ៍ឃាត់ខ្លួនបាន និងកសាងសំណុំរឿងបញ្ជូនឲ្យទៅដេកក្នុងពន្ធនាគារ ។
ជនទាំង២នាក់នេះ ម្នាក់ឈ្មោះ ឈាង ឫទ្ធា ភេទប្រុស អាយុ១៥ឆ្នាំ និងម្នាក់ទៀតឈ្មោះ ហ៊ាង ប៊ុនហាក់ ភេទប្រុស អាយុ១៦ឆ្នាំ ។ ទាំង២នាក់មានទីលំនៅក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ជាមួយនឹងការចាប់ឃាត់ខ្លួន សមត្ថកិច្ចក៏បានចាប់យកវត្ថុតាងមាន ម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០២២ ពណ៌ខ្មៅ គ្មានផ្លាកលេខ ជាមធ្យោបាយជិះធ្វើសកម្មភាព កាបូបដាក់លុយ១ អត្តសញ្ញាណប័ណ្ណថតចម្លង១សន្លឹកឈ្មោះ ទូច សំណាង ប័ណ្ណចាក់វ៉ាក់សាំងកូវីដ-១៩ មួយសន្លឹក ឈ្មោះ ទូច សំណាង ប័ណ្ណសម្គាល់យានយន្ត១សន្លឹក កាបូបក្រវាត់ចង្កេះ១ជារបស់ជនរងគ្រោះ លុយចំនួន៣១៨ដុល្លារនិង១.១២១.០០០រៀល និងទូរស័ព្ទដៃម៉ាកអុបប៉ូ១គ្រឿង ជារបស់ជនរងគ្រោះ ។
សមត្ថកិច្ចនគរបាល បានតាមប្រមាញ់ចាប់ខ្លួនជនទាំង២នាក់ជាក់ស្តែង ដោយដកហូតបានវត្ថុតាងកាបូបប្រាក់និងលុយរបស់ជនរងគ្រោះមកវិញផងដែរ ។ នៅចំពោះមុខសមត្ថកិច្ច ជនសង្ស័យបានសារភាពថា ដំបូងឈ្មោះ ឈាង ឫទ្ធា ជិះម៉ូតូចេញពីផ្ទះរបស់ខ្លួនទៅយកបក្ខពួកឈ្មោះ ហ៊ាង ប៊ុនហាក់ ដែលរស់នៅក្នុងភូមិជាមួយគ្នា ។ ពេលជួបគ្នាហើយ ក៏បានឲ្យឈ្មោះ ហ៊ាង ប៊ុនហាក់ ជាអ្នកបើកម៉ូតូ ឯឈ្មោះ ឈាង ឫទ្ធា ជិះពីក្រោយ ដោយប្រាប់គ្នាថាយកឡេទៅឲ្យគេនៅម្ដុំរង្វង់មូលកួរស្រូវ ។ នៅពេលទៅដល់រង្វង់កួរស្រូវ ក៏ជិះហួសទៅទៀតតាមផ្លូវជាតិលេខ២ រហូតហួសផ្សារដើមអំពិល ឃុំបឹងខ្យាង ឃើញស្ត្រីម្នាក់ជិះម៉ូតូម្នាក់ឯង និងមានកាបូបលុយដាក់ជាប់នឹងចង្កេះ ពួកគេក៏បត់ម៉ូតូត្រឡប់ក្រោយ ។ បន្ទាប់មក ពួកគេក៏ធ្វើសកម្មភាពឆក់កាបូបលុយនោះបានសម្រេច រួចបើកម៉ូតូបំណងជិះគេចខ្លួន តែត្រូវម្ចាស់កាបូបជិះម៉ូតូដេញតាមហើយស្រែកថា ចោរៗ ។
កម្លាំងប្រជាការពារ និងនគរបាលប៉ុស្តិ៍ឃុំបឹងខ្យាង ដែលកំពុងល្បាតតាមផ្លូវ ក៏ហៅតាមវិទ្យុទាក់ទងឲ្យកម្លាំងសមត្ថកិច្ចកន្លែងផ្សេងទៀតជួយស្ទាក់ ។ រីឯជនទាំង២នាក់នៅពេលរត់គេចខ្លួនដល់ភូមិតាដោលទី ឃុំអំពៅព្រៃ ក៏ផ្តួលម៉ូតូចោលរួចនាំគ្នារត់គេចខ្លួនតាមវាលស្រែ រហូតដល់ភូមិស្វាយព្រៃ ឃុំកណ្តោក ក៏ត្រូវកម្លាំងប្រជាការពារ និងនគរបាលប៉ុស្តិ៍ឃុំកណ្តោកចាប់ខ្លួនបាន រួចបញ្ជូនទៅកាន់អធិការដ្ឋាននគរបាលស្រុកកណ្តាលស្ទឹង ដើម្បីចាត់ការតាមច្បាប់ ៕