មនុស្សម្នាក់ ស្លា-ប់ នៅកន្លែងកើតហេតុ និងម្នាក់ទៀតរងរបួសធ្ងន់ ដោយសារ គ្រោះថ្នាក់ចរាចរ រវាងរថយន្តបុកម៉ូតូពីរគ្រឿង

កំពត៖ នៅ ថ្ងៃទី២៤ ខែកុម្ភៈ ឆ្នាំ២០២២ ត្រង់ចំណុចភូមិបឹងធំខាងកើត ឃុំអង្គសុរភី ស្រុកកំពង់ត្រាច ខេត្តកំពត។

មុនពេលជួបរឿងអកុសល គេឃើញជនរងគ្រោះទាំងពីរនាក់ ធ្វើដំណើរតាមម៉ូតូពីរគ្រឿងផ្សេងគ្នាក្នុងទិសដៅពីកើតទៅលិច ដោយជនរងគ្រោះ(អ្នកស្លាប់) ជិះម៉ូតូម៉ាកC125 ផលិតឆ្នាំ២០១៤ នៅខាងមុខ រីឯម្នាក់ទៀតដែលរងរបួសធ្ងន់ជិះម៉ូតូC125 សេរីឆ្នាំ២០២០នៅខាងក្រោយ លុះមកដល់ចំណុចកើតហេតុ ក៏មានរថយន្តម៉ាក ម៉ាស្តា(Mazda) ពណ៌ស មួយគ្រឿងបានបោះពួយក្នុងល្បឿនលឿនមកពីលិចទៅកើត ក្នុងទិសដៅផ្ទុយគ្នា ហើយរថយន្តបង្កបានវ៉ាជែងរថយន្តមួយគ្រឿងផ្សេងទៀតនៅខាងមុខ ទើបជ្រុលទៅបុករះម៉ូតូជនរងគ្រោះទាំងពីរគ្រឿង បណ្តាលឱ្យមានមនុស្សស្លាប់និងរបួសធ្ងន់ ហើយរថយន្តបង្កបានបើកគេចឆ្ពោះទៅទិសខាងលិចបាត់ស្រមោលតែម្តង។
សមត្ថកិច្ចបានឱ្យដឹងថា អ្នកស្លាប់ក្នុងហេតុការណ៍ខាងលើ មានឈ្មោះ ចាន់ ភារម្យ ភេទប្រុស អាយុ៤៥ឆ្នាំ មានទីលំនៅក្នុងទីរួមស្រុកកំពង់ត្រាច ខេត្តកំពត ដោយជនរងគ្រោះជិះម៉ូតូ ម៉ាក C125 ផលិតឆ្នាំ២០១៤ ពាក់ស្លាកលេខ ភ្នំពេញ 1S-0032។ដោយឡែកអ្នករងរបួសធ្ងន់ ជិះម៉ូតូC125 ឆ្នាំ២០២០ មិនទាន់ស្គាល់អត្តសញ្ញាណនៅឡើយ ខណៈជនរងគ្រោះត្រូវបានគេដឹកបញ្ជូនទៅសង្គ្រោះនៅឯមន្ទីរពេទ្យ ៕